“O‘g‘limning tarbiyasi, ta’limida bizdan ko‘ra bobo-buvisining o‘rni katta” — Sherzodxon Qudratxo‘janing onasi bilan suhbat

“Mashhurlarning onasi” loyihasining navbatdagi soni mehmoni taniqli telejurnalist, O‘zbekiston jurnalistika va ommaviy kommunikatsiyalar universiteti rektori Sherzodxon Qudratxo‘janing onasi Muhtabarxon Qudratxo‘jayeva bo‘ldi.

Birinchi daromadiga soat sotib olgan

— Sherzodxonning bolaligi juda ham mazmunli o‘tgan. Turmush o‘rtog‘im ikkimiz ertalabdan kechgacha ishda yurardik. Bolam ota-onasidan ko‘ra bobo-buvisiga ko‘proq mehribon bo‘lgan. Qaynotam lavozim kishisi bo‘lsa-da, qiyin yillarni ko‘rgan, hayotiy tajribasi boy inson edi. Shuningdek, uyda qo‘y va tovuqlar boqardi. Sherzodxondagi hayvonot va o‘simliklar olamiga qiziqish bobosidan o‘tgan.

Qaynotam siyosat sohasini yaxshi tushungani bois nabirasiga bu mavzularda ham gapirardi, urush davridagi hayot va keyingi jarayonlarni taqqoslab, fikrlarini so‘rardi. O‘g‘lim maktabda gumanitar fanlardan a’lo bahoga o‘qigan. Ma’lum vaqt baliq, keyin qush boqishga qiziqqan. Keyinchalik suzishga qatnagan.

O‘z ustida ishlash, kelajagi uchun mehnat qilish maktab davridan boshlangan. 7-sinf paytida mehnat darsida “rozetka” yasab, uni o‘qituvchisiga topshirgan va shundan topgan puliga o‘zi uchun soat sotib olmoqchi bo‘lgan. Ikkimiz do‘konga borib, 19 so‘m-u 50 tiyinga soat olganmiz. O‘g‘limda o‘z ustida ishlash, ota-onaga yordam berish kichikligidan shakllangan.

Siyosat sohasini tanlaganidan ikkilanmaganmiz

— Farzandimni jurnalistika, siyosat sohasiga kirib kelishi bizni ikkilantirmagan. 4-sinfda o‘qiyotganida turli gazetalarga kichik-kichik narsalar yozardi. Undagi rivojlanish, qiziqishni ko‘rgan dodasi siyosat olamining o‘ziga xos qiyinchiliklari haqida so‘zlardi, bu sohada xato qilishda ehtiyot bo‘lishini ta’kidlardi.

Katta bo‘lgani sari bobosi urush yillaridagi siyosat haqida ham gapirib berar, Sherzodxon turli savollariga javob olardi. Otasi bilan Rossiyaning mashhur “Vremya” dasturini ko‘p ko‘rardi. Rahmatli dodasi o‘g‘limning hayotida katta rol o‘ynagan. Qaynonam ham o‘qimishli ayol bo‘lgan, Vazirlar Mahkamasida faoliyat yuritgan.

Sherzodxon yillar o‘tib, jurnalistikani tanladi. “Hurriyat”, “Toshkent oqshomi”, “Xalq so‘zi” kabi gazetalarda maqolalari chiqaverdi. Uning matbuotdagi chiqishlari nafaqat meni, balki yaqinlar va qarindoshlarni ham xursand qilgan. Ilk marta “Axborot” ko‘rsatuvida chiqqanida ham cheksiz quvonganmiz. O‘sha paytdagi his-tuyg‘ular baribir boshqacha bo‘lgan.

Darsini qildira olmaganim uchun bir marta urganman

— Sherzodxon oilada uch farzandning to‘ng‘ichi. Ukasi undan bir yosh kichkina, aytganimizni a’lo darajada bajaradi. Qizim ham jurnalist — ozgina qaysar. Balki, bu jurnalistlarga xosdir. Sherzodxon erkin bo‘lishni yoqtiradi. Uchalasi ham ota-onasi, atrofidagilarga mehribon, hamisha yordam qo‘lini cho‘zishga intiladi.

Turmush o‘rtog‘im bilan farzand tarbiyasiga jiddiy qaraganmiz, ularni to‘g‘riso‘zlikka, odillikka o‘rgatdik. Xato qilsalaringiz ham yolg‘on gapirmanglar, derdim. Banda borki xato qiladi, xatoyingni tan olib, kerak bo‘lsa, kechirim so‘ra, deb uqtirardim. Ularga yolg‘on gapirib, aldash orqali biror nimaga qiziqtirmaganman. Bu usulni yoqtirmayman. Ortiqcha baqirib, urgan emasman. Esimda: Sherzodxonni 1-sinfda o‘qigan paytida bir marta urganman. Unda ham darsini qildira olmaganman, asabim dosh berolmagan. O‘sha voqeani unutolmaydi o‘zi ham.

Safarlarga ketsa, men uchun Toshkent huvullab qolgandek bo‘ladi

— O‘g‘lim uylanib, oila qurguncha biz bilan bir xonadonda yashagan. U o‘qish yoki ishda bo‘lgan vaqtlari uyimiz huvullab qolardi. Ancha yil oldin Amerikaga bordi, unda yosh edi. O‘sha paytda AQShning qaysidir hududida kuchli portlash yuz berganidan xabar topdik. Allohga shukrki, Sherzodxon portlash joyidan bir necha soat avval intervyu olib ketgan ekan. Bu butun umr yuragimga muhrlanib qolgan.

Hozir ham safarlarga chiqsa, men uchun Toshkent huvullab qolgandek tuyuladi. Uning hayotida Xalqaro press-klub paydo bo‘lgach, yanada xavotir olishni boshladim. Jamoasini duo qilib o‘tiraman. Biror viloyatga borganini televideniye orqali ko‘rib, xabar topaman. Ungacha o‘zi indamaydi. Xavotir olmasin, deydimi, bilmadim. Lekin kuniga bir marta bo‘lsayam telefon qilib, dadasi ikkimizdan hol-ahvol so‘raydi.

Sherzodxon oilada yaxshi ota. Balki, ona bo‘lganim uchun shunaqa deb o‘ylarman. Lekin atrofdagilar ham buni e’tirof etishadi. Farzandlarining barcha orzularini iloji boricha amalga oshirishga harakat qiladi.

Loyihaning to‘liq variantini “Daryo”ning YouTube’dagi sahifasi orqali tomosha qilishingiz mumkin.

Mirolim Isajonov suhbatlashdi.

Tasvirchi va montajchi: Ilhom Xursanaliyev