Shavkat Mirziyoyev huzurida 2022-yilda bojxona ma’murchiligini yanada takomillashtirish va sohani korrupsiyadan xoli tizimga aylantirish bo‘yicha ustuvor vazifalar yuzasidan yig‘ilish bo‘lib o‘tmoqda. Prezident matbuot kotibi Sherzod Asadovning yozishicha, yig‘ilishda bojxona tizimida kelgusi ikki yilda ayollar ulushini kamida 2 barobarga oshirish bo‘yicha vazifa qo‘yilgan.
Yig‘ilishda, shuningdek, xodimlarning ijtimoiy himoyasini kuchaytirish chora-tadbirlari belgilab berilgan:
- Olot, Guliston, Termiz va boshqa hududlardagi olis postlarda ishlaydigan xodimlar uchun xizmat uylari barpo etiladi;
- joriy yilda uy-joyga ehtiyoji bor 100 nafar va har yili kamida yana shunchadan xodim imtiyozli ipoteka bilan ta’minlanadi;
- bojxona xodimlari va ularning farzandlari uchun oliy o‘quv yurtlariga kirishda alohida kvota ajratiladi.
“Sohada adolat, halollik va tartibni joriy qilishni xohlar ekanmiz, tizimga ayol xodimlarni jalb qilish uchun barcha zarur shart-sharoitlarni yaratishimiz shart”, — degan davlat rahbari. Shu munosabat bilan kelgusi ikki yilda ayollar ulushini kamida 2 barobarga oshirish bo‘yicha ishlarni hozirdan boshlash vazifasi qo‘yilgan.
Avvalroq O‘zbekiston bojxona tizimida xodimlar daromadi va mol-mulkini deklaratsiya qilish joriy etilishi to‘g‘risida xabar berilgandi.
Izoh (0)