“Noobod mahalla”: Yangiyo‘lning eskirgan yo‘llari

“Noobod mahalla” dasturining e’tibori bu gal Toshkent viloyati Yangiyo‘l tumanidagi “Fayzobod” va “Olmos” mahallalariga qaratildi. Ushbu mahallalar hududida joylashgan ko‘chalarga kirib borar ekanmiz, aholini qiynayotgan muammolar ortiqcha izohsiz bizga namoyon bo‘la boshladi.

Yomg‘ir yog‘ganda botqoqqa aylanadigan ko‘chalar, yoritkichi yo‘q yo‘llar, kanalizatsiyasiz uylar, muammolardan to‘yib ketgan odamlar…

Abgor yo‘llar tufayli “Fayzobod” va “Olmos” mahallasi aholisi yana bir muammoga duch kelmoqda: taksi haydovchilari mashinasi buzilishidan qo‘rqib, bu ko‘chaga kirishni istamas ekan.

Shunday og‘ir sharoitda yashashiga qaramay, mahalla aholisi qo‘l qovushtirib o‘tirgani yo‘q. Ular vaqti vaqti bilan hashar o‘tkazib, yo‘llarni chiqindilardan tozalab turishadi, yo‘llarni tekislashadi, lekin baribir muammoni to‘liq bartaraf etishga kuchlari ham, mablag‘lari ham yetmayapti.

Mahalla aholisining bizga ma’lum qilishicha,  ko‘chalarda yoritish tizimining yo‘qligi bir muammo bo‘lsa, ana shu qorong‘i ko‘chalarda daydi itlarning ko‘pligi dard ustiga chipqon.

Mazkur muammoga to‘la ko‘chalar biryo‘la ikki mahalla hududida joylashgani tufayli biz “Fayzobod” va “Olmos” mahallalari raislaridan izoh olishga harakat qildik.

Birinchi bo‘lib, “Fayzobod” mahallasi raisi Fazliddin Abdullayev o‘z fikrlarini bildirib o‘tdi.

2018-yilda mahallamiz “Obod mahalla” dasturiga tushgan. Undan tashqari, Osiyo Taraqqiyot banki tomonidan ham shu ikkita mahallani obodonlashtirish uchun 35 million dollar miqdorida mablag‘ ajratilgan. Barcha ishlar navbatma-navbat bajariladi. Dastlab suv quvurlari o‘tkazilib, aholini toza ichimlik suvi bilan ta’minlash amalga oshiriladi. Ana undan keyin yo‘llar asfalt qilinib, yoritish tizimi o‘rnatiladi.

Fazliddin Abdullayev, “Fayzobod” mahallasi raisi

Obodonlashtirish ishlari 3 ta bosqichda bo‘ladi. Dastlab zarur joylarda suv quvurlari almashtiriladi. Keyin esa kanalizatsiya o‘tkaziladi. Uchinchi bosqichda esa yo‘llar, yoritish tizimlari yaxshi holatga keltiriladi. Faqat ozgina sabr qilish kerak.

Ahmadjon Mirzaabdullayev, “Olmos” mahallasi raisi