Imom-xatiblarga jamiyatda ixtilof keltirib chiqaruvchi mavzularni muhokama qilmaslik haqida tushuntirish berildi — O‘zbekiston musulmonlari idorasi

Ijtimoiy tarmoqlarda ba’zi imom domlalarning diniy e’tiqod mavzusida bildirgan fikrlari turli muhokamalarni keltirib chiqarmoqda. O‘zbekiston musulmonlari idorasining ma’lum qilishicha, alohida diniy xodimlarning shaxsiy fikri idoraning rasmiy munosabatini ifoda etmaydi.

Ma’lum qilinishicha, 17-fevral kuni O‘zbekiston musulmonlari idorasining Odob-axloq komissiyasi chaqirilib, so‘nggi vaqtda ijtimoiy tarmoqlarda muhokamalarga sabab bo‘layotgan masalalar ko‘rib chiqilgan. Yig‘ilishda imom-xatiblarga jamiyatda ixtilof keltirib chiqaruvchi mavzularni masjid mehrobida turib muhokama qilmaslik, va’z-nasihatlarda odob-axloq, diniy-ma’rifiy qadriyatlarni asrab-avaylash, ibodatlarni to‘g‘ri va mukammal ado etish bo‘yicha mo‘min-musulmonlarga yo‘l-yo‘riq ko‘rsatish haqida tushuntirish berilgan.

“Shuningdek, O‘zbekiston musulmonlari idorasi tizimidagi barcha masjid xodimlari el-yurt manfaati va farovonligi yo‘lida muqaddas dinimiz buyurgan amri ma’ruf va nahyi munkarda, jumladan, jamiyatda uchrab turadigan ayrim ijtimoiy illatlarga qarshi ma’rifiy targ‘ibot olib borishda bardavom ekanini ma’lum qiladi hamda ushbu yo‘nalishda davlat va jamoat tashkilotlari bilan yaqin hamkorlik munosabatlari mavjudligini ta’kidlaydi.

Buning yorqin dalili sifatida shu kunlarda taniqli ulamolarimiz Toshkent shahridagi masjidlar va boshqa turli tashkilotlarda amalga oshirayotgan ma’rifiy-tarbiyaviy suhbatlarni misol keltirish mumkin.

O‘zbekiston musulmonlari idorasi diniy soha xodimlarini jamoaviy va ijtimoiy tarmoqlardagi chiqishlarda amaldagi qonunchilikka rioya etishga, amri ma’ruf va nahyi munkarni Hazrati Payg‘ambarimiz Muhammad sallallohu alayhi vasallam sunnatlari asosida olib borishga chaqiradi. Fuqarolardan esa bunday mavzularni g‘arazli maqsadlarda ijtimoiy tarmoqlarda ommalashtirmaslikni so‘raydi”, — deyiladi xabarda.

Avvalroq Vazirlar Mahkamasi huzuridagi Din ishlari bo‘yicha qo‘mita ijtimoiy tarmoqlarda diniy masala hamda O‘zbekistonning din sohasidagi pozitsiyasi borasida turli bahs-munozaralar tarqalayotgani sabab fuqarolarga murojaat bilan chiqqandi.