Ijtimoiy tarmoqlarda so‘mning muomalaga kiritilganiga 20 yil to‘lishi munosabati bilan 20 raqami tushirilgan banknota videosi tarqaldi. Markaziy bank mazkur holatga munosabat bildirib, tasvirlardagi namuna bank tomonidan muomalaga chiqarilgan pul belgisi hisoblanmasligini ma’lum qildi.
“O‘zbekiston Respublikasining Markaziy banki to‘g‘risida”gi qonunga asosan O‘zbekiston hududida qonuniy to‘lov vositasi sifatida pul belgilari faqat Markaziy bank tomonidan muomalaga chiqariladi. Yangi namunalardagi pul belgilari muomalaga chiqarilishi to‘g‘risidagi xabar, shuningdek, ularning tavsiflari Markaziy bank tomonidan ommaviy axborot vositalarida e’lon qilinadi.
Ta’kidlanishicha, ijtimoiy tarmoqlarda tarqalgan ushbu namuna Markaziy bank tomonidan emas, balki “Davlat belgisi” korxonasi tomonidan 2014-yilda yubiley sana munosabati bilan korxonaning reklama mahsuloti (suvenir) sifatida chiqarilgan. Mazkur banknot hech qanday qiymat o‘lchoviga ega emas (unda so‘m yozuvi qayd etilmagan), muomala va to‘lov vositasi sifatida foydalanishga mo‘ljallanmagan.
Shu sababli Markaziy bank ijtimoiy tarmoq foydalanuvchilaridan aholi orasida har xil savollar va tushunmovchiliklarni keltirib chiqarmaslik maqsadida asossiz axborotlarni tarqatmaslik so‘ragan.
“Dunyodagi barcha banknot chop etuvchi kompaniyalar tomonidan yangi himoya elementlari joriy etilgani yoki boshqa ishlab chiqarish yangiliklari bilan tanishtirish maqsadida, biror yubiley sana yoki kompaniya faoliyatiga aloqador voqeaga bag‘ishlab faqat raqam qo‘yilgan, valyuta nomi qayd etilmagan banknotlar chop etib boriladi va ular korxona faoliyatini reklamasi uchun mo‘ljallangan bo‘ladi”, — deyiladi munosabatda.
Eslatib o‘tamiz, 2021-yilda O‘zbekistonda muomalada bo‘lgan 7 ta banknotadan 6 tasi yangilandi. Xususan, o‘tgan yilning 27-dekabridan 50 000 va 100 000 so‘mlik, 14-iyunidan 2 000 va 20 000 so‘mlik, 26-avgustidan 5 ming va 10 ming so‘mlik banknotalar yangi ko‘rinishda muomalaga chiqarildi.
Izoh (0)