2022-yil yanvar oyida 113,2 ming dona avtotransport vositalari davlat ro‘yxatidan o‘tkazildi. Bu haqda “Review.uz” xabar bermoqda.
Bu ko‘rsatkich o‘tgan yilning yanvariga nisbatan 126,4 foizga, 2020-yil yanvar oyiga nisbatan esa 138,4 foizga ko‘p. 2021-yilning dekabriga nisbatan o‘sish sur’ati 96,5 foizni tashkil etdi.
Qayd etilishicha, avtomobillarni ro‘yxatdan o‘tkazishning keskin darajada o‘sishini 2022-yil 1-yanvardan avtotransport vositalarini sotib olganlik uchun yig‘imning to‘liq bekor qilinishi sabab bo‘lgan.
1-rasm. Ro‘yxatga olingan va qayta ro‘yxatdan o‘tgan avtomobillar sonini o‘zgarishi indeksi
2022-yil yanvar oyigacha fuqarolar ikkilamchi bozordan sotib olingan avtomobillarni davlat ro‘yxatidan o‘tkazish o‘rniga “umumiy ishonchnoma” rasmiylashtirishni afzal ko‘rar edi.
Qonunchilikka kiritilgan o‘zgartirishlar natijasida avval “umumiy ishonchnoma” bo‘yicha avtomashina sotib olgan fuqarolar ham avtotransportni o‘z nomiga rasmiylashtira boshladi.
Joriy yilning yanvar oyida birlamchi bozordan sotib olingan avtomobillar soni 27,9 mingtani tashkil etgan. Yil boshidan buyon avtomobillar savdosi 2021 yil dekabr oyiga nisbatan 2,7 foizga oshdi.
Bozorning o‘sishi, asosan, foydalanilgan avtomobillarni sotish va sotib olish hisobiga ta’minlandi. Ikkilamchi bozorda xarid qilingan avtomobillar soni 85,3 mingta (o‘sish 180,2 foiz)ga yetdi.
2 rasm. 2021-2022-yilda birlamchi va ikkilamchi bozorlarda sotilgan avtomobillar
Yangi avtotransport vositalarini ro‘yxatdan o‘tkazishlar soni Samarqand (95,6 foiz), Surxondaryo (89,4 foiz), Navoiy (75,4 foiz) va Farg‘ona (60,5 foiz) viloyatlarida sezilarli darajada oshgan bo‘lsa, Toshkent shahrida (-44,7 foiz) va Toshkent viloyatida (-0,9 foiz) kamayish kuzatildi.
Chet elda ishlab chiqarilgan avtomobillar oldi-sotdi shartnomalari soni 1,9 mingtani tashkil etib, 2021-yil dekabr oyiga nisbatan 41 foizga kamaydi (2021-yil yanvar oyiga nisbatan o‘sish – 71 foiz).
3-rasm. 2021–2022 yil yanvar-noyabr oylarida ichki bozorda sotilgan yangi yengil avtomobillar
Ikkilamchi bozordan sotib olingan avtotransport vositalarini rasmiylashtirishlar soni eng ko‘p bo‘lgan hududlar:
- Toshkent shahri – 13,6 ming (2021-yil dekabrda – 2,1 ming)
- Samarqand – 9,7 ming (3,7 ming)
- Farg‘ona – 9 ming (2,9 ming)
- Namangan – 8,1 ming (2,7 ming)
- Andijon – 7,2 ming (2,3 ming) viloyatlari bo‘ldi.
Avvalroq prezident Shavkat Mirziyoyev topshirig‘iga ko‘ra import avtomobillari uchun bojxona boji 2 barobarga qisqartirilgani haqida xabar berilgan edi.
Izoh (0)