Fulbrayt granti laureati Karolin Mesa uchun 2021-yil Markaziy Osiyoda O‘zbekistonning qishloq joylarida ingliz tili va kompyuter texnologiyalarini o‘rgatish bilan o‘tdi.
“Bu dunyoning narigi tomonidagi odamlarga amerikalik bo‘lish nimani anglatishini his qildirish va AQShga ijobiy nuqtayi nazarni oshirishning bir usuli. Fulbrayt bu global missiyada yordam berish imkoniyatidir”, — deydi Karolin Mesa.
Karolin Mesa Florida Gulf Coast University’ning 2016-yildan beri birinchi Fulbrayt granti sovrindori bo‘ldi.
“Urganchda yashayotganimda o‘zimni AQShning ko‘p joylariga qaraganda xavfsizroq his qildim, O‘zbekiston juda xavfsiz joy. Menga ko‘rsatilgan mehmondo‘stlik esa tengsiz edi. U yerda o‘rtacha ish haqi oyiga 100 dan 200 dollargacha, lekin odamlar juda ochiqko‘ngil. Men uchrashgan odamlar muzlatgichidagi hamma narsasini menga berishni xohlashardi”, — deya aytib o‘tdi Mesa.
Mesaning Fulbrayt muddati 2020-yilning kuzida boshlanishi rejalashtirilgan edi, ammo global pandemiya sayohatni kechiktirdi.
Mesa o‘zbek tilini yetti haftalik intensiv kursda o‘rgangan, biroq Urganch aholisi u o‘zlashtirgan tildan farqli shevada gaplashgani sabab qiynalganini aytib o‘tdi. O‘zbek tili uning to‘rtinchi tili edi.
“Biz o‘zimizga ishonganimizdan ko‘ra ko‘proq moslashuvchanmiz”, — deydi Karolin.
Karolin Mesa Fulbrayt o‘qituvchisi sifatida Urganch davlat universitetida ishlaydi. Uning vazifasi ingliz tili darslarini o‘tish, talabalariga onlayn tarzda qanday izlanishlar olib borishni ko‘rsatish va konferensiyalarda axborot texnologiyalarini sinflarga kiritish bo‘yicha nutq so‘zlashdan iborat edi. Mesa hattoki an’anaviy o‘zbek raqslarini ham o‘rgandi.
“Yosh o‘zbek qizlari 20 yoshda turmush qurish va farzand tarbiyasi kabi madaniy udumlarga duch keilishadi. Men ular bilan poytaxtda mavjud bo‘lgan amaliyot dasturlari haqida ko‘plab imkoniyatlarni o‘rtoqlashdim, lekin ko‘p shogirdlarim o‘qishga qabul qilingan taqdirda ham ota-onalari ruxsat bermasliklarini aytishadi”, — deydi Karolin Mesa.
Izoh (0)