Noyabr oyidagi o‘sishdan so‘ng bug‘doyning jahon narxi yana oshishda davom etmoqda. Bunga Ukraina va Rossiya bo‘yicha keskinlik kuchayib, ikki yirik yuk jo‘natuvchining don eksporti to‘xtatilishi mumkinligi sabab bo‘lmoqda. Bu haqda Bloomberg xabar berdi.
Rossiyaning Ukraina yaqinida amalga oshirayotgan harbiy harakatlari bilan bog‘liq keskinlikning hal qiluvchi haftasi kirib keldi. AQSh bosqin bo‘lishi mumkinligi haqida ogohlantirdi. Rossiya prezidenti Vladimir Putin Amerikani uning talablarini bajarmaslikda aybladi.
Chikagodagi bug‘doy fyucherslari o‘tgan haftadagi 5,3 foizlik o‘sishdan keyin 1,7 foizga ko‘tarildi. Noyabr oyida don narxi 2012-yildan beri eng yuqori ko‘rsatkichga yetgan edi. Hozirgi narx esa o‘sha vaqtdagisidan 7 foiz past bo‘lib qolmoqda.
Qora dengiz mintaqasidan eksport qilinadigan yuklar jahon don yetkazib berish xavfsizligini ta’minlashning kalitidir. Bug‘doy va arpa eksportining qariyb uchdan bir qismi, makkajo‘xori savdosining beshdan bir qismi Rossiya va Ukraina hissasiga to‘g‘ri keladi.
Mintaqadagi uzoq davom etgan tartibsizliklar ushbu tovarlar narxining yuqori bo‘lishini ta’minlashi va oziq-ovqat narxining so‘nggi o‘n yillikdagi eng yuqori ko‘rsatkichga yetkazishi mumkin.
Ukrainadagi keskinliklar sababli makkajo‘xori va soya loviyalari ham qimmatladi. Janubiy Amerikadagi issiq va quruq ob-havo esa ekinlar borasida xavotirni ko‘paytirmoqda.
Avvalroq Aqsh Rossiyaning Ukrainaga hujumi 16-fevralda boshlanadi deb hisoblashi haqida xabar berilgan edi.
Izoh (0)