2022-yil yanvar oyida respublika bo‘yicha 17,7 mingta ko‘chmas mulk oldi-sotdi shartnomalari rasmiylashtirildi. Bu haqda “Review.uz” xabar bermoqda.
Bu ko‘rsatkich 2021-yilning shu davriga nisbatan 2,4 foizga kamroq. Biroq 2020-yilning yanvar oyiga nisbatan o‘sish sur’ati 15 foizni tashkil etdi.
Mutaxassislarning fikricha, ko‘chmas mulk bozoridagi faollik yil boshida muntazam ravishda pasayadi. Yanvar oyida yangi yil dam olishlari va ish ta’tillari paytida xaridorlar odatda ko‘chmas mulk sotib olmaydi. Bahorga kelib, uy-joy bozoridagi faollik tiklanadi.
Hududlar kesimida yanvar oyida ko‘chmas mulk sotuvi bo‘yicha eng yuqori o‘sish sur’atlari Qashqadaryo (36,4 foiz), Farg‘ona (16 foiz), Surxondaryo (11,1 foiz) viloyatlarida kuzatildi.
Toshkent (-17,6 foiz) viloyati, Qoraqalpog‘iston (-14,4 foiz) va Toshkent shahrida (-6,7 foiz) sezilarli kamayish qayd etildi.
1-rasm. Ko‘chmas mulkni sotib olish va sotish bo‘yicha rasmiylashtirilgan shartnomalar sonining o‘zgarish indeksi
“Review.uz”" data-action="zoom" class="border lazyload" />
2-rasm. Toshkent va Toshkent viloyatida ko‘chmas mulk oldi-sotdisi bo‘yicha tuzilgan shartnomalar soni
“Review.uz”" data-action="zoom" class="border lazyload" />
Ikkilamchi bozorda uy-joy narxlarining o‘zgarishi
Hisob-kitoblarga ko‘ra, yanvar oyida ikkilamchi bozorda uy-joy o‘rtacha narxlari o‘tgan oyga nisbatan 1,4 foizga o‘sdi (2021-yil dekabrda o‘zgarmagan, noyabrda 1,2 foizga ko‘tarilgan edi).
Uy-joy narxlarda eng yuqori o‘sish sur’atlari Farg‘ona (5,2 foiz), Andijon (5,0 foiz) va Navoiy (4,5 foiz) viloyatlarida kuzatilgan bo‘lsa, Jizzax (-4,2 foiz), Surxondaryo (-3,1 foiz), Namangan (-2,3 foiz) va Sirdaryo (-2,1 foiz) viloyatlarida narxlarda pasayish qayd etildi.
Toshkent shahrida uy-joy narxlari 2,4 foizga o‘sdi. Uy-joy narxlarida eng katta o‘sish Mirzo Ulug‘bek (5,0 foiz) Mirobod (4,5 foiz) va Yashnobod (4,3 foiz) tumanlarida kuzatilgan bo‘lsa, Uchtepa (-1,4 foiz) va Olmazor (0,7 foiz) tumanlarida uy-joy narxlari pasaygan.
Markaziy bank hisob-kitoblariga ko‘ra, 2021-yilda tijorat banklari tomonidan qariyb 59,6 ming nafar fuqaroga 9,8 trln so‘m miqdorida ipoteka kreditlari ajratilgan. Ushbu ko‘rsatkich 2020-yilga nisbatan 700 mlrd so‘mga ko‘proq hisoblanadi.
2022-yil 1-yanvar holatiga ko‘ra, ipoteka kreditlari qoldig‘i 35,8 trln so‘mga yetgan. Ajratilgan kreditlarning 7,35 trln so‘mi birlamchi bozordagi uylarga, 2,44 trln so‘mi ikkilamchi bozordagi uylar uchun yo‘naltirilgan.
Avvalroq O‘zbekistonda uylarning o‘rtacha narxi ma’lum qilingan edi.
Izoh (0)