Ўзбекистон автомобиль бозорида жадал ўсиш кузатилди. Бунга нима сабаб бўлди?

2022 йил январь ойида 113,2 минг дона автотранспорт воситалари давлат рўйхатидан ўтказилди. Бу ҳақда «Review.uz» хабар бермоқда.

Бу кўрсаткич ўтган йилнинг январига нисбатан 126,4 фоизга, 2020 йил январь ойига нисбатан эса 138,4 фоизга кўп. 2021 йилнинг декабрига нисбатан ўсиш суръати 96,5 фоизни ташкил этди.

Қайд этилишича, автомобилларни рўйхатдан ўтказишнинг кескин даражада ўсишини 2022 йил 1 январдан автотранспорт воситаларини сотиб олганлик учун йиғимнинг тўлиқ бекор қилиниши сабаб бўлган. 

1-расм. Рўйхатга олинган ва қайта рўйхатдан ўтган автомобиллар сонини ўзгариши индекси

2022 йил январь ойигача фуқаролар иккиламчи бозордан сотиб олинган автомобилларни давлат рўйхатидан ўтказиш ўрнига «умумий ишончнома» расмийлаштиришни афзал кўрар эди. 

Қонунчиликка киритилган ўзгартиришлар натижасида аввал «умумий ишончнома» бўйича автомашина сотиб олган фуқаролар ҳам автотранспортни ўз номига расмийлаштира бошлади.

Жорий йилнинг январь ойида бирламчи бозордан сотиб олинган автомобиллар сони 27,9 мингтани ташкил этган. Йил бошидан буён автомобиллар савдоси 2021 йил декабрь ойига нисбатан 2,7 фоизга ошди.

Бозорнинг ўсиши, асосан, фойдаланилган автомобилларни сотиш ва сотиб олиш ҳисобига таъминланди. Иккиламчи бозорда харид қилинган автомобиллар сони 85,3 мингта (ўсиш 180,2 фоиз)га етди.

2 расм. 2021-2022 йилда бирламчи ва иккиламчи бозорларда сотилган автомобиллар

Янги автотранспорт воситаларини рўйхатдан ўтказишлар сони Самарқанд (95,6 фоиз), Сурхондарё (89,4 фоиз), Навоий (75,4 фоиз) ва Фарғона (60,5 фоиз) вилоятларида сезиларли даражада ошган бўлса, Тошкент шаҳрида (-44,7 фоиз) ва Тошкент вилоятида (-0,9 фоиз) камайиш кузатилди.

Чет элда ишлаб чиқарилган автомобиллар олди-сотди шартномалари сони 1,9 мингтани ташкил этиб, 2021 йил декабрь ойига нисбатан 41 фоизга камайди (2021 йил январь ойига нисбатан ўсиш – 71 фоиз).

3-расм. 2021–2022 йил январь ноябрь ойларида ички бозорда сотилган янги енгил автомобиллар

Иккиламчи бозордан сотиб олинган автотранспорт воситаларини расмийлаштиришлар сони энг кўп бўлган ҳудудлар:

• Тошкент шаҳри – 13,6 минг (2021 йил декабрда – 2,1 минг)
• Самарқанд – 9,7 минг (3,7 минг)
• Фарғона – 9 минг (2,9 минг)
• Наманган – 8,1 минг (2,7 минг)
• Андижон – 7,2 минг (2,3 минг) вилоятлари бўлди.

Аввалроқ президент Шавкат Мирзиёев топшириғига кўра импорт автомобиллари учун божхона божи 2 баробарга қисқартирилгани ҳақида хабар берилган эди.