«Ўзбекнефтгаз» АЖ бошқаруви раиси Меҳриддин Абдуллаевнинг топшириғига асосан, тизимдаги корхоналарда молиявий ва комплаенс назорати йўналишида коррупция, иқтисодий жиноятларга қарши курашишга, уларнинг келгусида йўл қўйилишини олдини олишга қаратилган профилактик тадбирлар, ўрганишлар амалга оширилмоқда.
Хусусан, «Бухоро нефть базаси» МЧЖда 2021 йил якуни бўйича ўтказилган ўрганишларда, жами 22 миллиард 58 миллион сўмлик хато, камчиликлар аниқланган бўлиб, мазкур ҳолатларни бартараф этиш, ҳуқуқий баҳо бериш мақсадида ҳуқуқни муҳофаза қилувчи органлар билан ҳамкорликда тегишли чоралар кўрилди.
Бироқ мазкур нефть базада ўтказилаётган ўрганишлар жараёнида юқорида келтирилган қонун бузулишларга қўшимча равишда яна 5 миллиард 506 миллион сўмлик манфаатлар тўқнашуви, қариндош уруғчилик ва бошқа турли хато ва камчиликлар, шундан 3 миллиард 465 миллион сўм маблағларни талон-тарож қилиш ҳолатлари аниқланди. Таъкидлаш жоизки, мазкур аниқланган ҳолатларнинг асосий қисми Бухоро нефть базасининг собиқ бош ҳисобчиси Ғ.К.нинг бевосита иштирокида амалга оширилган.
Бундан ташқари, нефть база ҳисоб рақамига келиб тушмаган 330,3 миллион сўм пул маблағларини ҳисобчи А.Ж.га қарашли корхонанинг интерактив картасига қасддан, сунъий равишда киритиб, нефть маҳсулотлари тўловсиз бериб юборилган. Амалдаги қонунчиликка асосан нефть маҳсулотлари биржа савдолари орқали реализация қилиниши белгиланган бўлсада, хусусий корхона орқали сохта тикетлар асосида 40,0 миллион сўмлик нефть маҳсулотлари олиб чиқиб кетилган.
Собиқ бош ҳисобчи Ғ.К. томонидан 1S бухгалтерия электрон ҳисоботларда «яқин дўсти»га қарашли корхонадан 917,6 миллион сўм, бошқа корхонадан 252,0 миллион сўмлик маблағ тушганлиги тўғрисидаги сохта маълумотлар киритиш йўли билан нефть маҳсулотлари ўзлаштирилган.
2020 йилнинг 18 август куни «Д» МЧЖга «кўрсатилган хизматлар учун» 250,0 миллион сўм пул маблағлари ўтказиб берилган, 1S бухгалтерия дастурига Бухоро товар хом ашё биржасига нефть маҳсулотлари учун маблағ ўтказилгани тўғрисида сохта маълумотлар киритилиб, 250,0 миллион сўм пул маблағлари ўзлаштирилган. Амалда эса ушбу корхона билан Бухоро нефть базаси ўртасида хизмат кўрсатиш бўйича тузилган шартномалари мавжуд бўлмаган.
55 та фермер хўжаликларидан тўловлар мавжудлиги тўғрисида 1S бухгалтерия дастурига сохта маълумотлар киритиш йўли билан жами 641,0 миллион сўмлик нефть маҳсулотларининг талон-тарожлигига йўл қўйилган.
Собиқ бош ҳисобчи томонидан «Кўкча» филиали бошлиғи Ш. Ж. 3 та истеъмолчи томонидан 430,8 миллион сўм тўлов амалга оширилгани тўғрисида ёлғон маълумотлар бериш орқали 430,8 миллион сўмлик нефть маҳсулотларни тўловларсиз ўзлаштирган.
Ачинарлиси, собиқ бош ҳисобчи таъсисчилигида очилган корхонага тўғридан-тўғри манфаатлар тўқнашувига йўл қўйилган ҳолда ҳеч қандай шартномалар расмийлаштирмасдан, 2020 йилнинг август—декабрь ойлари давомида жами 419,0 миллион сўм пул маблағлари молиявий ёрдам сифатида ўтказиб берилган, шунингдек, 1S бухгалтерия электрон дастурига мазкур маблағларни Бухоро вилоят Товар хом ашё биржасига нефть маҳсулотлари учун ўтказиб берилганлик тўғрисида сохта маълумотлар киритилиб, ўзлаштирилиб юборилган.
Ғ.К. шахсий манфаатдорлиги бўлган бошқа корхонанинг Бухоро нефть базаси олдидаги 2 миллиард 40 миллион сўмлик қарздорликни ундириш бўйича 2020 йил 3 март куни иқтисодий суднинг тегишли ижро варақасини ҳамда 2020 йил 25 апрель кунидаги мажбурий ижро бюроси органларининг ижро иши юритишни қўзғатиш тўғрисида қарори ижросини таъминламаслик ва қарздорликни ундирмаслик мақсадида, Мажбурий ижро бюросининг тегишли бўлинмасига 2020 йил 24 ноябрь куни қарздорликни ундириш бўйича ижро ишини тўхтатишни сўраб, «Бухоро нефть базаси» МЧЖ раҳбари номидан сохта маълумот киритган ва бу билан ижро ишини тўхтатишга эришган.
«Ўзбекнефтгаз» АЖ Молиявий ва комплаенс назорат департаменти томонидан ўтказилган ўрганишлар давомида манфаатлар тўқнашувига йўл қўйилганлиги аниқланди, яъни ушбу нефть базада узоқ йиллар раҳбар ва бош муҳандис лавозимларида ишлаган З.Б.га қарашли корхонага 4 540 литр AI-80 маркали автобензин маҳсулотига тўловлар амалга оширилмаган бўлсада бериб юборилган. Ўрганиш кунига қадар эса ундириш чоралари мутлақо кўрилмаган.
Аниқланган ҳолатлар бўйича камчиликларни ундириш ва вазиятга ҳуқуқий баҳо бериш учун ўрганиш ҳужжатлари тегишли тартибда ҳуқуқни муҳофаза қилувчи идораларга тақдим этилди.
«Ўзбекнефтгаз» АЖ матбуот хизмати
Изоҳ (0)