Тошкент шаҳридаги «Коинот» (Космонавтлар) мажмуасидаги объектларда қурилиш ишлари бошлангани йўқ. Бу ҳақда 15 февраль куни Яккасарой туман ҳокими Анвар Сайфиддинов журналистлар билан бўлган очиқ мулоқотда айтиб ўтди.
Ижтимоий тармоқларда Тошкент шаҳридаги «Коинот» (Космонавтлар) мажмуасида Владимир Жанибеков ҳайкали атрофидаги гранит плиталар кўчириб ташлангани ҳақида хабар тарқалди. Шундан сўнг Маданий мерос агентлиги ҳудуднинг демонтаж ишлари рухсатсиз бошланганини аниқлади. Агентлик томонидан майдонни реконструкция қилаётган Mimar Group компанияси огоҳлантирилгани ва жараён тўхтатилгани маълум қилинди.
Анвар Сайфиддиновнинг айтишича, майдон ўтган асрнинг 70 йилларда қурилган ва ҳозирда ҳайкаллар атрофи таъмирталаб ҳолга келиб қолган.
«Кеча ижтимоий тармоқларда Космонавтлар майдони бузилмоқда, маданий мерос объектига зарар етмоқда, деган хабарлар тарқалди. Аслида ундай эмас. Лойиҳага кўра, иккала объект ҳам жойида қолади, уларга тегилмайди. Фақатгина атрофини замонавий кўринишга келтириш учун таъмирлаш ишлари олиб борилади. Унинг ранги, ишлатилаётган мармарлар ва қурилиш материаллари Маданий мерос агентлиги билан биргаликда муҳокама қилиняпти», — деди туман раҳбари.
Ҳокимнинг таъкидлашича, плиталарни кўчириш ишлари тўхтатилган.
«Маданий мерос объектларини муҳофаза қилиш агентлиги кенгашидан рухсат олинмагани учун ишлар тўхтатилди. Ҳозир рухсат олиш ишлари расмийлаштирилмоқда. Ҳеч ким ҳеч нарсани бузаётгани йўқ. Эски, абгор тошларни жойидан қўзғатишди. Ҳали қурилиш ишлари бошлангани йўқ, фақатгина тайёргарлик кетмоқда. Бу ерни Тошкент шаҳар ҳокимлиги таъмирламоқчи. Ишлар расмий тасдиқланган лойиҳа асосида қилинади. Таклиф оммага ёққанидан кейин ҳужжатлар тайёрланади. Тўғри тушунишимиз керакки, техник томондан ҳужжатларни тайёрлаш кўп вақт олади. Бир кунда ёки 1 соатда битмайди бу ҳужжатлар. Буни таъмирлаш ишлари билан параллел олиб борамиз. Чунки тайёргарликка ҳам кўп вақт керак. Лекин ҳеч бир ишни ноқонуний бошламаймиз. Ҳамма ҳужжатлар тасдиқлангандан кейин бошланади. Баҳор келяпти. Агар ҳамма ҳужжатни нуқта вергулигача қиладиган бўлсак, ярим йиллаб вақт ўтиб кетади. Ёз ҳам ўтиб кетиши мумкин. Бу нарса ёзда керак-ку», — деди Яккасарой тумани ҳокими.
Унинг қўшимча қилишича, лойиҳа битишига 2 ойча вақт кетиши мумкин.
«Дарё» мухбири ҳолатни ўрганиш мақсадида воқеа жойида бўлди. Ўрганишлар натижасида Маданий мерос агентлиги ва Анвар Сайфиддинов айтган гаплар тасдиғини топмади. Ҳайкаллар атрофида кўчирилган плиталарни майдондан олиб чиқиб кетилаётгани, яъни ишлар тўхтатилмагани маълум бўлди.
Маълумот учун, 1984 йилда очилган Космонавтлар майдони монументал санъат ёдгорликлари рўйхатига киритилган ва (ҳукуматнинг 2019 йил 4 октябрдаги қарори билан) давлат муҳофазасига олинган. Қонунчиликка мувофиқ, маданий ва моддий мерос объектларида қурилиш, таъмирлаш ва реставрация ишларини фақат Маданий мерос агентлиги ҳузуридаги Илмий-эксперт кенгаши тасдиқлаганидан кейин амалга оширишга рухсат берилади. Юқоридаги ҳолатда эса демонтаж ишларига бу каби рухсат олинмаган. Тошкент шаҳри ва Яккасарой тумани ҳокимликлари қурилиш ишлари бошланиши ҳақида ҳеч қандай хабар эълон қилмаган.
Изоҳ (0)