Andijon viloyatining Oltinko‘l tumanida shar’iy nikohdagi xotinining sobiq qaynonasini ketmon bilan urib o‘ldirgan erkakka sud hukmi o‘qildi. Bu haqda “Daryo”ga Andijon viloyati sudi axborot xizmati ma’lum qildi.
Aniqlanishicha, sudlanuvchi M.R. 2018-yilning bahorida oltinko‘llik E.M. bilan tanishib qolib, unga turmush o‘rtog‘i vafot etganini, uch nafar farzandi bilan yolg‘iz qolganini aytib, shar’iy nikoh asosida oila qurgan.“Birinchi turmushim bilan ajrashgan bo‘lsam-da, bir uyda boshqa-boshqa xonalarda yashardik. 2019-yilning mart oyida Rossiyadan kelganimda sobiq xotinim uydan chiqib ketishimni so‘radi. Shundan keyin shar’iy nikohdagi xotinim bilan yashashni boshladim. Avvaliga tinch yashadik. Bir devor narida M. ismli kampir ham yashardi. Keyinchalik u turmush o‘rtog‘imning sobiq qaynonasi ekanligini bildim. Ayolim bilan birga yashash davomida Rossiya, Qirg‘izistonga borib, ishlab keldik. 2021-yilning mart oyi boshlarida Qirg‘izistondan qaytganimda xotinim yashab turgan uyimizni nomiga ololmayotganini, bunga sobiq qaynopalari rozi bo‘lmaganini, oqibatda bir necha marotaba janjal bo‘lganini aytdi. Yo‘qligimda hatto tuman hokimi kelib mojaroni tinch yo‘l bilan hal qilib berishini, buning uchun qaynona va kelin yashab turgan xonadonlar o‘rtasidagi devor qurilishini tugallab berishini aytgan. Shunday bo‘lsa-da, xotinimning qaynonasi devor qurilishiga qarshilik ko‘rsatgan”, — deydi sudda so‘z olgan sudlanuvchi M.R.
Sudlanuvchining aytishicha, kundalik janjallarning birida shar’iy nikohdagi xotinining sobiq qaynonasi uni haqorat qilib, kelgindi degan. Uning o‘ldirilishiga aynan shu so‘zi sabab bo‘lgan.
“‘Ha, kelgindi. Endi bu yerga kelib olib, uyni o‘zingniki qilib olmoqchimisan? Bu yerda mening nabiralarim bor. Kelinim va bollarini olib, bu yerdan ket. Bu uyda boshqa nabiralarim yashaydi’, deya meni doimiy qarg‘aydigan odat chiqarib oldi”, — deydi sudlanuvchi M.R.
Sud hujjatlarida qayd etilishicha, M.R. 2021-yilning 14-aprel kuni ertalab bozorga borib, qurilish materiallarini olib qaytayotganda, shar’iy nikohdagi xotini E.M. qo‘ng‘iroq qilib, uyga ustalar kelganini aytgan. Shunda u ko‘chadan spirtli ichimlik ichib, uyiga qaytgan. Uyga qaytgach, avvaliga xotini bilan, so‘ngra devor urayotgan ustalar bilan tortishgan. Hatto mushtlashishgacha borgan. Bu holatni ko‘rgan xotinining sobiq qaynonasi uni yana qarg‘agan. O‘rtadagi tortishuv ularning katta janjaliga aylangan. Shunda erkak shu yerdagi ketmonni olib, qaynonaning boshiga, yuziga urib, uni o‘ldirib qo‘ygan.
Sud hukmi bilan M.R. Jinoyat kodeksining 97-moddasi 1-qismi (qasddan odam o‘ldirish) bilan aybdor deb topilib, 11 yil muddatga ozodlikdan mahrum qilingan. Shuningdek, undan jabrlanuvchining vakili foydasiga o‘n besh million so‘m ma’naviy zarar undirish belgilangan.
Izoh (0)