Австралиялик ҳамширалар иш ҳақининг пастлиги ва оғир меҳнат шароити устидан норозилик билдириб, кўчаларга чиқди, деб ёзади Daily Mail.
Австралиянинг Янги Жанубий Уэльс штатида давлат шифохоналари ва клиникаларининг бир неча минг ходимлари иш ҳақини ошириш ва ишчилар хавфсизлигини талаб қилиб, иш ташлашга қўшилди.
Штатнинг ҳамширалар ва акушерлар ассоциацияси (NSWNMA) маълум қилишича, иш ташлашни минтақадаги ўқитувчилар касаба уюшмалари ва Австралия Бирлашган иттифоқи қўллаб-қувватлаган.
Қайд этилишича, ҳамширалар ва акушерлар Янги Жанубий Уэльс бош вазири Доминик Перрот тиббиёт ходимларининг хавфсизлик талаблари бузилгани ҳақидаги шикоятларини тинглаб, COVID-19 пандемияси туфайли давлат шифохоналари, поликлиникалар ва туғруқхоналарда кадрлар етишмовчилиги кучайганига эътибор қаратишига умид билдирган.
Бундан ташқари, давлат поликлиникалари ходимлари пандемия даврида ҳамширалар ва санитарларнинг иш юки сезиларли даражада ошгани ва коронавирус юқтириб олиш хавфига қарамай, ишлашда давом этганини таъкидлаб, ҳукумат ваъда қилганидек иш ҳақини 2,5 фоиздан юқорига оширишни талаб қилмоқда.
Минтақа соғлиқни сақлаш вазирлиги маълумотларига кўра, иш ташлашда ўнлаб давлат шифохоналарининг камида 5 минг ҳамшира ва акушерлари иштирок этган, бироқ уларнинг аксарияти тушликдан сўнг хизматга қайтган.
Изоҳ (0)