Andres Inyesta “Barselona”ga qaytishga tayyorligini aytdi

Yaponiyaning “Vissel Kobe” jamoasi futbolchisi Andres Inyesta “Barselona”ga qaytishni xohlayotganini aytdi.

“‘Barselona’ga jon deb qaytgan bo‘lardim. Jamoaga yordam berishni xohlayman. Bu yerda juda ko‘p narsalar o‘zgarmoqda va kelajakda nima bo‘lishini oldindan aytish qiyin.

‘Barselona’ — mening uyim va hech qayer uning o‘rnini bosa olmaydi. Hamon futbol ichida bo‘lish va u haqida o‘ylash yoqadi. Bu menga eng ko‘p hayajon bag‘ishlaydi. Murabbiy yoki sport direktori bo‘lishni xohlayotganimni tushunaman. Kelajagim futbol bilan bog‘liq bo‘lishi lozim”, — deydi 37 yoshli Inyesta.

Ispaniyalik futbolchi 2002-yildan 2018-yilga qadar “Barselona” sharafini himoya qilgan va jamoa bilan 32 ta sovrin qo‘lga kiritgan. 2018-yilda erkin agent sifatida “Vissel Kobe”ga o‘tgan edi. Inyestaning Yapon klubi bilan amaldagi shartnomasi 2024-yilda o‘z nihoyasiga yetadi.