Futbolchilarning 75 foizi Jahon Chempionatini har 2 yilda o‘tkazilishiga qarshi ekani ma’lum bo‘ldi

Xalqaro professional futbolchilar assotsiatsiyalari federatsiyasi (FIFPro) FIFAning Jahon Chempionatini har ikki yilda o‘tkazish g‘oyasi bo‘yicha futbolchilar o‘rtasida so‘rovnoma o‘tkazdi.

So‘rovnomada ishtirok etgan futbolchilarning 75 foizi mundialni hozirgidek har to‘rt yilda bir o‘tkazilishi tarafdori ekanligini bildirdi. So‘rovnomada hozirda to‘p surayotgan 1000 nafar futbolchi ishtirok etdi.

Yevropa va Osiyoda 77% futbolchi Jahon birinchiligini to‘rt yilda bir o‘tkazishni qo‘llab-quvvatlab ovoz bergan.

Amerikada musobaqaning amaldagi formatini 63% futbolchi, Afrikada esa 49% futbolchi yoqlagan.

So‘rovnomada ishtirok etgan 81% futbolchi ichki milliy chempionat va Jahon Chempionatini o‘zining sevimli musobaqasi ekanligini bildirgan.

Avvalroq FIFA 2026-yildan boshlab futbol bo‘yicha Jahon Chempionatini har ikki yilda o‘tkazishni borasida o‘z tasarrufidagi milliy assotsiatsiyalarni ogohlantirgani, FIFAga a’zo assotsiatsiyalarning 2/3 qismi ushbu g‘oyaga xayrixoh ekani xabar qilingandi. Xususan, O‘FA Jahon Chempionatini har 2 yilda o‘tkazish taklifini qo‘llab-quvvatlashini ma’lum qilgan edi.