Ноябрь ойидаги ўсишдан сўнг буғдойнинг жаҳон нархи яна ошишда давом этмоқда. Бунга Украина ва Россия бўйича кескинлик кучайиб, икки йирик юк жўнатувчининг дон экспорти тўхтатилиши мумкинлиги сабаб бўлмоқда. Бу ҳақда Bloomberg хабар берди.
Россиянинг Украина яқинида амалга ошираётган ҳарбий ҳаракатлари билан боғлиқ кескинликнинг ҳал қилувчи ҳафтаси кириб келди. АҚШ босқин бўлиши мумкинлиги ҳақида огоҳлантирди. Россия президенти Владимир Путин Американи унинг талабларини бажармасликда айблади.
Чикагодаги буғдой фьючерслари ўтган ҳафтадаги 5,3 фоизлик ўсишдан кейин 1,7 фоизга кўтарилди. Ноябрь ойида дон нархи 2012 йилдан бери энг юқори кўрсаткичга етган эди. Ҳозирги нарх эса ўша вақтдагисидан 7 фоиз паст бўлиб қолмоқда.
Қора денгиз минтақасидан экспорт қилинадиган юклар жаҳон дон етказиб бериш хавфсизлигини таъминлашнинг калитидир. Буғдой ва арпа экспортининг қарийб учдан бир қисми, маккажўхори савдосининг бешдан бир қисми Россия ва Украина ҳиссасига тўғри келади.
Минтақадаги узоқ давом этган тартибсизликлар ушбу товарлар нархининг юқори бўлишини таъминлаши ва озиқ-овқат нархининг сўнгги ўн йилликдаги энг юқори кўрсаткичга етказиши мумкин.
Украинадаги кескинликлар сабабли маккажўхори ва соя ловиялари ҳам қимматлади. Жанубий Америкадаги иссиқ ва қуруқ об-ҳаво эса экинлар борасида хавотирни кўпайтирмоқда.
Аввалроқ Ақш Россиянинг Украинага ҳужуми 16 февралда бошланади деб ҳисоблаши ҳақида хабар берилган эди.
Изоҳ (0)