Shavkat Mirziyoyev mas’ullarga avtomobil uchun navbatda turgan fuqarolarga aniq sana ko‘rsatilgan xabarnoma yo‘llash topshirig‘ini berdi

Shavkat Mirziyoyev 14-fevral kuni mashinasozlik sanoatida 2022-yilda amalga oshiriladigan ishlarga bag‘ishlangan yig‘ilish o‘tkazdi. Unda avtomobil olishdagi navbatlar va qishloq xo‘jaligi mashinasozligiga doir bir qator topshiriqlar berildi, deb xabar bermoqda prezident matbuot kotibi Sherzod Asadov.

Qayd etilishicha, yig‘ilishda qishloq xo‘jaligi mashinasozligi klasterini tashkil etish bo‘yicha barcha masalalar hal qilib berilgani va bunga budjetdan 100 milliard so‘m mablag‘ ajratilgani ko‘rsatib o‘tilgan.

Uch oy muddatda “Texnolog” va “Agregat” zavodlari asbob-uskunalarini “Chirchiq klasteri”ga ko‘chirib, qurilish-montaj ishlarini 2022-yilning 1-dekabr sanasiga qadar to‘liq yakunlashga ko‘rsatma berilgan.

“Bu degani ‘Chirchiq klasteri’ 2023-yildan to‘liq ishlashni boshlashi kerak”, — degan davlat rahbari.

Soha rahbarlari oldiga 2022-yilda qishloq xo‘jaligi mashinasozligida:

• qishloq xo‘jaligi texnikasi tannarxini 12 foizga kamaytirish;
• ishlab chiqarishni 2 barobarga oshirish;
• eksportni 15 million dollarga yetkazish vazifasi qo‘yilgan.