Шавкат Мирзиёев 14 февраль куни машинасозлик саноатида 2022 йилда амалга ошириладиган ишларга бағишланган йиғилиш ўтказди. Унда автомобиль олишдаги навбатлар ва қишлоқ хўжалиги машинасозлигига доир бир қатор топшириқлар берилди, деб хабар бермоқда президент матбуот котиби Шерзод Асадов.
Қайд этилишича, йиғилишда қишлоқ хўжалиги машинасозлиги кластерини ташкил этиш бўйича барча масалалар ҳал қилиб берилгани ва бунга бюджетдан 100 миллиард сўм маблағ ажратилгани кўрсатиб ўтилган.
Уч ой муддатда «Технолог» ва «Агрегат» заводлари асбоб-ускуналарини «Чирчиқ кластери»га кўчириб, қурилиш-монтаж ишларини 2022 йилнинг 1 декабрь санасига қадар тўлиқ якунлашга кўрсатма берилган.
«Бу дегани ‘Чирчиқ кластери’ 2023 йилдан тўлиқ ишлашни бошлаши керак», — деган давлат раҳбари.
Соҳа раҳбарлари олдига 2022 йилда қишлоқ хўжалиги машинасозлигида:
- қишлоқ хўжалиги техникаси таннархини 12 фоизга камайтириш;
- ишлаб чиқаришни 2 баробарга ошириш;
- экспортни 15 миллион долларга етказиш вазифаси қўйилган.
Изоҳ (0)