Toshkent shahri bo‘yicha 606 ta chiqindi yig‘ish maydonchalari mavjud. Chiqindi yig‘ish shoxobchalarining 71 foizi Toshkent shahar “Maxsustrans” ishlab chiqarish boshqarmasiga, qolgan 29 foizi esa xususiy xizmat ko‘rsatish shoxobchalariga tegishli. Bu haqda Toshkent shahar “Maxsustrans” ishlab chiqarish boshqarmasi maslahatchisi Ismoil Sagdullayevga tayanib, O‘zA xabar berdi.
Ta’kidlanishicha, shahar bo‘yicha 1000 ta chiqindi shoxobchasining har biridan kuniga 2-3 kilogrammdan jami 2 tonnaga yaqin non chiqindiga olib chiqib tashlanadi. Ishchilar bu nonlarning yaxshilarini mol-qo‘y boqadigan odamlarga berib yuboradi. Mog‘orlaganlarini esa ariqqa oqizishga majbur bo‘lishadi.
Shavkat Mirziyoyev 2-fevral kuni chiqindilar bilan ishlash tizimini takomillashtirishga doir yig‘ilishda maishiy chiqindiga to‘lov yig‘ish tizimi haqida gapirib o‘tgandi. Yig‘ilishda Toshkent shahridagi “Maxsustrans” korxonasining transformatsiya jarayonlarini yakunlab, uning negizida xususiy sherikchilik korxonasini tashkil etishi zarurligi ko‘rsatib o‘tilgan edi.
Eslatib o‘tamiz, 2019-yilda Toshkent shahridagi maishiy chiqindilar tashlanadigan Ohangaron tumanidagi poligon 98 foizga to‘lgani ma’lum qilingandi. Senator Bahodir To‘ychiyev O‘zbekistonda 2028-yilgacha chiqindilarni to‘plash va olib chiqib ketish xizmatini barcha hududlarda 100 foizga yetkazish rejalashtirilganini aytgandi.
Izoh (0)