Sambo bo‘yicha jahon chempioni, qashqadaryolik sportchi Kamoliddin Rasulov o‘limida ayblanayotgan fuqaro ishi sudda ko‘rib chiqilmoqda. Bu haqda “Daryo”ga marhumning turmush o‘rtog‘i Gulnoza Xolmurodova xabar berdi.
Ma’lum qilinishicha, mazkur qotillik ishi bo‘yicha dastlabki sud majlisi 2022-yilning 8-fevral kuni Jinoyat ishlari bo‘yicha Uchtepa tuman sudi binosida bo‘lib o‘tgan.
“Dastlabki sud majlisida ayblanuvchi Sh.T. so‘z olib, voqeani o‘z talqini bo‘yicha so‘zlab berdi. Uning birinchi gapi ikkinchisiga qovushmayapti. Aytayotgan so‘zlari o‘lda-jo‘lda. Shuningdek, mening ikkita savolimga ham tayinli javob bermadi”, — deydi jabrlanuvchi Gulnoza Xolmurodova.
Marhumning xotiniga ko‘ra, u sudda ayblanuvchiga yuzlanib, turmush o‘rtog‘i uni dori ichishga majburlagan yoki majburlamagani, shuningdek, o‘sha dori uning sog‘lig‘iga qay darajada ta’sir etgani bilan qiziqqan.
“Ayblanuvchi dorini Kamoliddin akamga havas qilib, undagi sportchilarga xos o‘zgarishlarga havas qilib, ichganini o‘z tili bilan aytyapti. Lekin dori sog‘lig‘iga zarar berganini, o‘lishi mumkinligini qo‘shimcha qilmoqda. Mana, sog‘siz-ku, desam, o‘lishdan qo‘rqib yuribman deyapti”, — deydi Gulnoza Xolmurodova.
Gulnoza Xolmurodovaning qo‘shimcha qilishicha, sud 2022-yilning 18-fevral kuni soat 14:30 ga qadar tanaffus e’lon qilgan.
Eslatib o‘tamiz, avvalroq qashqadaryolik jahon chempioni 29 yoshli Kamoliddin Rasulov 2021-yilning 13-sentabr kuni soat 21:30 da Toshkent shahrining Uchtepa tumanida boshqa bir sportchi tomonidan pichoqlab o‘ldirilgani haqida xabar berilgandi. Mazkur xabarni tasdiqlagan Bosh prokuratura axborot xizmati rahbari Hayot Shamsutdinov voqea yuzasidan Uchtepa tumani prokuraturasi tomonidan Sh.T.ga nisbatan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, u Jinoyat protsessual kodeksining 221-moddasi tartibida ushlanganini bildirgandi. Keyinchalik “Mening yurtim” telekanalining “Markaziy studiya” ko‘rsatuvi ijodkorlari jamoatchilikka voqea sodir bo‘lgan hududdagi kuzatuv kameralariga tushib qolgan videoni e’lon qildi. Unda yaralangan sportchini ikki kishi quvlab ketayotgani ko‘ringan. Bu haqda “Daryo” muxbiri bilan suhbatlashgan marhumning yaqinlari ham “O‘sha kuni kelinimiz voqeani ko‘rgan. Ukam yaralangach, qochgan. Ortidan esa ikki kishi quvgan. Uchinchi kishi esa yo‘lini to‘sib, uni ushlagan”, — degandi.
Izoh (0)