O‘zbekiston Superligasining 2022-yilgi mavsumida bir nechta jamoa stadionidagi muammo sabab, ma’lum muddat uy o‘yinlarini boshqa klub stadionida o‘tkazishi ma’lum qilindi.
“Surxon” stadioni talab darajasiga kelguniga qadar klub o‘z uy uchrashuvlarini Samarqanddagi “Dinamo” stadionida o‘tkazadi. “Qo‘qon-1912” esa Yaypandagi “O‘zbekiston” stadionida raqiblarini qabul qiladi.
“Neftchi” va “Olimpik” jamoalari stadionida ta’mirlash ishlari olib borilayotgani tufayli, ular mavsum startida uy o‘yinlarini boshqa arenalarda o‘tkazadi. “Neftchi” Yaypandagi “O‘zbekiston” stadionidan, “Olimpik” Toshkentdagi “Paxtakor” stadionidan foydalanib turadi.
Shuningdek, “Qizilqum” klubi uy stadionida maydonni yangilash ishlarini olib borilishi sabab Superliga mavsumining dastlabki turlarini Olmaliqning “OKMK” klubi o‘yingohida o‘tkazadi.
Shu sabab Superligaga qur’a tashlash vaqtida uy o‘yinlarini bir stadionda o‘tkazadigan klublar o‘zaro juftliklarga ajratib olinadi. Shu orqali bir tur doirasida mazkur jamoalarning biri safarda, ikkinchisi esa uyda o‘ynashi ta’minlanadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)