FIFA turkmanistonlik futbolchi bilan bog‘liq muammo sabab “Buxoro”ga qo‘yilgan taqiqni olib tashladi

FIFA “Buxoro”ga qo‘yilgan transfer taqiqini olib tashladi. Bu haqida PFL matbuot xizmati ma’lum qildi.

FIFA Nizolarni hal etish palatasi “Buxoro” klubi va uning sobiq darvozaboni turkmanistonlik Rahat Japarov o‘rtasidagi nizoli vaziyat yuzasidan qaror chiqarib, klubga futbolchi oldidagi belgilangan qarzdorlikni to‘lash vazifasini yuklagan edi. Ammo mazkur qaror ijrosi ta’minlanmagani bois FIFA yanvar oyida “Buxoro” uchun transfer taqiqini kuchga kiritgandi.

10-fevral kuni “Buxoro” jamoasi Japarov oldidagi qarzdorlikni to‘liq bartaraf etdi va ishni yopish yuzasidan FIFAga murojaat yubordi. FIFA 11-fevraldan e’tiboran mazkur ishni yopdi va “Buxoro”dan transfer taqiqini olib tashladi.

Ayni paytda klub 2021-yilgi mavsumda faoliyat olib borgan tojikistonlik futbolchi va murabbiylari bilan bog‘liq nizoli vaziyatni bartaraf etish ustida ish olib bormoqda.

Avvalroq, FIFA “Nasaf” klubi va fransiyalik futbolchi Abdelaye Diakite o‘rtasidagi nizoli vaziyat tufayli Qarshi jamoasiga transfer taqiqini qo‘ygandi.