ФИФА «Бухоро»га қўйилган трансфер тақиқини олиб ташлади. Бу ҳақида ПФЛ матбуот хизмати маълум қилди.
ФИФА Низоларни ҳал этиш палатаси «Бухоро» клуби ва унинг собиқ дарвозабони туркманистонлик Раҳат Жапаров ўртасидаги низоли вазият юзасидан қарор чиқариб, клубга футболчи олдидаги белгиланган қарздорликни тўлаш вазифасини юклаган эди. Аммо мазкур қарор ижроси таъминланмагани боис ФИФА январь ойида «Бухоро» учун трансфер тақиқини кучга киритганди.
10 февраль куни «Бухоро» жамоаси Жапаров олдидаги қарздорликни тўлиқ бартараф этди ва ишни ёпиш юзасидан ФИФАга мурожаат юборди. ФИФА 11 февралдан эътиборан мазкур ишни ёпди ва «Бухоро»дан трансфер тақиқини олиб ташлади.
Айни пайтда клуб 2021 йилги мавсумда фаолият олиб борган тожикистонлик футболчи ва мураббийлари билан боғлиқ низоли вазиятни бартараф этиш устида иш олиб бормоқда.
Аввалроқ, ФИФА «Насаф» клуби ва франциялик футболчи Абделае Диаките ўртасидаги низоли вазият туфайли Қарши жамоасига трансфер тақиқини қўйганди.
Изоҳ (0)