Farg‘onada ekstremistik oqim tarafdoriga nisbatan jinoyat ishi qo‘zg‘atildi, deb xabar bermoqda Davlat xavfsizlik xizmati.
Qayd etilishicha, Farg‘ona viloyatida yashovchi R.Sh. ismli erkak (1998-yilda tug‘ilgan) o‘zining uyali telefonidagi Telegram messenjerida akkaunt yaratib, u orqali diniy mavzuga ixtisoslashgan kanallarga a’zo bo‘lgan.
So‘ngra ushbu kanallarda joylashtirilgan xalqaro terroristik tashkilotlar va diniy ekstremistik oqimlarning g‘oyaviy rahnamolari bo‘lgan Sodiq Samarqandiy, Abu Saloh, Abdulloh Zufar va boshqalarning jihodga chorlovchi ma’ruzalarini hamda “Turkiston islom harakati” terroristik tashkilotiga tegishli audio-videomateriallarni yuklab olgan. Shuningdek, ularni Qo‘qon shahrida yashovchi tanishlariga ham tarqatgan.
DXX xodimlari tomonidan o‘tkazilgan tezkor tadbirda mazkur shaxs qo‘lga olinib, uning mobil telefoni protsessual tartibda rasmiylashtirib olingan.
Vazirlar Mahkamasi huzuridagi Din ishlari bo‘yicha qo‘mitaning ekspertiza xulosasiga ko‘ra, R.Sh.ning telefon apparati xotirasida saqlangan materiallar aqidaparastlik g‘oyalari bilan yo‘g‘rilgan bo‘lib, ularni O‘zbekiston hududiga olib kirish, tayyorlash va tarqatish taqiqlanadi.
Hozirda mazkur shaxsga nisbatan qo‘zg‘atilgan jinoyat ishi doirasida uning maslakdoshlarini aniqlash bo‘yicha ham tegishli chora-tadbirlar ko‘rilmoqda.
Mavzuga doir:
- O‘zbekistondagi ijtimoiy tarmoqlarda mavjud ekstremistik kanal va sahifalar ro‘yxati e’lon qilindi
- Surxondaryoda maktab o‘quvchilari orasida jihod va hijrat g‘oyalarini targ‘ib qilgan shaxslarga sud hukmi o‘qildi
- Toshkentda Suriyaga borib, jangarilar safiga qo‘shilishni rejalashtirgan talaba va ikki nafar maktab o‘quvchisi ushlandi
Izoh (0)