“Otashin shoir, tarjimon va dramaturg Usmon Nosir tavalludining 110 yilligini keng nishonlash to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar qildi.
Qayd etilishicha, qaror bilan 2022-yilda Usmon Nosir tavalludining 110 yilligini keng nishonlash belgilangan. Bu bo‘yicha tashkiliy qo‘mita tarkibi tasdiqlangan.
Qarorga ko‘ra, shoir tavalludining 110 yilligini keng nishonlash bo‘yicha chora-tadbirlar doirasida Usmon Nosir hayoti va faoliyatini, xususan, uning qatag‘on davrida kechgan yillarini o‘rganish, hozirga qadar noma’lum bo‘lib kelayotgan qo‘lyozma asarlarining taqdiri haqida ma’lumotlar to‘plash maqsadida ishchi guruh tuzilib, uning Ichki ishlar vazirligi, Davlat xavfsizlik xizmati, shuningdek, Rossiya Federatsiyasidagi tegishli arxiv materiallari bilan tanishishi uchun sharoit yaratiladi.
Shuningdek, Namangan shahrida Usmon Nosir haykali o‘rnatiladi. Toshkent va Namangan shaharlaridagi ko‘chalarga Usmon Nosir nomi beriladi. Umumiy o‘rta ta’lim muassasalari, ijod maktablari o‘quvchilari o‘rtasida Usmon Nosir hayoti va ijodiga bag‘ishlangan “Unutmas meni bog‘im” mavzusida insholar tanlovi o‘tkaziladi.
Ma’lumot o‘rnida, Usmon Nosir 1913-yilda Namanganda tug‘ilgan. Ijodiy faoliyati davomida “Quyosh bilan suhbat”, “Safarbar satrlar”, “Traktorobod”, “Yurak”, “Mehrim” nomli bir qator asarlar yaratgan. 1937-yilning 13-iyulida Usmon Nosir “xalq dushmani” tamg‘asi bilan surgun qilingan. Shoir Zlatoustsk qamog‘i, Vladivostok, Magadan, Mariinsk, Sibir lagerlarida saqlangan. 1944-yilning oxirlariga kelib Usmon Nosir oqlangan. Ammo shoir bu vaqtga kelib olamdan ko‘z yumgan. U 1944-yilning 9 mart kuni vafot etgan, 15 mart kuni Suslov qishlog‘idagi qabristonga dafn etilgan.
Izoh (0)