Toshkentda usta sherigini rezina shlang bilan urib, o‘ldirib qo‘ydi

Toshkent shahri Bektemir tumanida 7-fevral kuni usta janjal sabab sherigining o‘limiga sababchi bo‘ldi. Bu haqda Tergov departamenti xabar qildi.

Qayd etilishicha, shu kuni soat 17:00 larda Y.O. (43 yoshli) Bektemir tumani “Majnuntol” mahallasida joylashgan xonadonda ta’mirlash ishlarini olib borgan. Shu payt o‘zi bilan birga kelgan B.E. (43 yoshli) bilan o‘rtalarida kelishmovchilik kelib chiqqan. O‘zaro janjalda Y.O. rezinadan ishlangan quvur (shlang)ning bo‘lagi bilan B.E.ga tanasining turli sohalariga bir necha marotaba urib, tan jarohati yetkazgan.

Oqibatda B.E. olgan tan jarohatlari bilan Respublika shoshilinch tibbiy yordam ilmiy markaziga yotqizilgan. Ko‘rsatilgan tibbiy muolajalarga qaramasdan, u vafot etgan.

Holat yuzasidan Jinoyat kodeksining 104-moddasi 3-qismi “d” bandi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llangan.

Hozirda jinoyatning kelib chiqish sabablari o‘rganilmoqda.

Ma’lumot o‘rnida, bu turdagi jinoyatlar uchun 8 yildan 10 yilgacha ozodlikdan mahrum qilish jazosi belgilangan.