Қашқадарё вилояти Қарши давлат университетида 38 туп дарахт ноқонуний кесиб ташлангани хабар қилинганди. Бош прокуратура матбуот котиби ҳолат юзасидан қўшимча маълумот берди.
Қайд этилишича, Қарши давлат университетининг 6 нафар масъул ходимига нисбатан Маъмурий жавобгарлик тўғрисидаги кодекснинг 79-моддаси (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) 1-қисми билан маъмурий жавобгарликка оид иш қўзғатилган.
Ушбу ҳолатда табиатга 285 миллион сўм миқдорида зарар етказилгани аниқланган.
Эслатиб ўтамиз, ўрганишлар давомида Қарши давлат университети томонидан Ягона давлат интерактив хизматлари портали орқали давлат ўрмон фондига кирмайдиган дарахтларни кесиш учун уч маротаба мурожаат қилинган. Ўз навбатида Қашқадарё вилояти Экология ва атроф-муҳитни муҳофаза қилиш бошқармаси томонидан мазкур мурожаатларга рад жавоби берилган.
Экология ва атроф-муҳитни муҳофаза қилиш бошқармаси томонидан рад жавоби берилганига қарамасдан, университет ҳудудидаги жами 38 туп дарахт ноқонуний кесилгани аниқланган. Ҳуқуқбузарликка алоқадор шахслардан тушунтириш хатлари олинган.
Мавзуга доир:
Изоҳ (0)