O‘zbekistonda 2021-yil mobaynida jami 10 667 ta yong‘inlar sodir bo‘lib, ularda 240 nafar fuqaro tan jarohati olgan va 112 nafari halok bo‘lgan. Bu haqda AOKAda o‘tkazilgan brifingda Favqulodda vaziyatlar vazirligi axborot xizmati boshlig‘i o‘rinbosari Samandar Hikmatullayev ma’lum qildi.
Ushbu yong‘inlarning 83 tasi gaz ballonlaridan foydalanishda xavfsizlik qoidalarining buzilishi natijasida yuzaga kelgan bo‘lib, shulardan 2 tasi avtomobillarda, 81 tasi bino-inshootlarda sodir bo‘lgan. Natijada 5 nafar fuqaro vafot etgan va 22 nafar fuqaro tan jarohati olgan. Moddiy zarar miqdori 1,12 milliard so‘mdan ortiqni tashkil etgan.
Ta’kidlanishicha, gaz ballonlari bilan bog‘liq hayot uchun xavf tug‘diruvchi vaziyatlarning oldini olish hamda sinovdan o‘tkazilmagan gaz ballonlaridan foydalanish orqali yuzaga kelayotgan oqibatlarni keng ommaga yetkazish bo‘yicha barcha mas’ul tashkilotlar tomonidan keng qamrovli targ‘ibot tadbirlari olib borilmoqda.
“Transport vositalaridan yechib olingan foydalanishga yaroqsiz bo‘lgan gaz ballonlaridan turar joylar hamda maishiy va savdo obyektlarida foydalanish holatlari uchramoqda”, — deydi Hikmatullayev.
- gaz ballonlaridan foydalanishda xavfsizlik qoidalariga va gaz idorasi xodimlari tomonidan berilgan yo‘riqnoma talablariga qat’iy amal qilish, gaz balonini gaz idorasining loyihasida belgilangan joydan boshqa joyga ko‘chirmaslik;
- turar joylar, dala hovlilar va tashkilotlarning hududidagi ochiq maydonlar ichida yengil alangalanuvchi va yonuvchi suyuqliklar bo‘lgan idishlarni hamda siqilgan va suyultirilgan gaz bilan to‘ldirilgan ballonlarni qoldirmaslik;
- gaz ballonlari yonida ochiq olovdan foydalanmaslik;
- gaz to‘ldirilgan ballonlarni saqlash, tashish va foydalanishda ularni quyosh nurlari va boshqa issiqlik manbalari ta’siridan himoyalanishini ta’minlash;
- xonalarda o‘rnatiladigan gaz ballonlarini isitish radiatorlari va boshqa isitish asbob-uskunalaridan kamida 1 metr masofada, ochiq olovli issiqlik manbalaridan esa kamida 5 metr masofada bo‘lishiga e’tibor qaratish;
- bir xonada kislorod va gaz bilan to‘ldirilgan ballonlar hamda kalsiy karbidi, bo‘yoqlar, moylar va yog‘larni saqlamaslik;
- yonuvchi gaz bilan to‘ldirilgan ballonlarni, yengil alangalanuvchi va yonuvchi suyuqliklarni yakka tartibdagi va ko‘p kvartirali uylarning evakuatsiya yo‘llarida, sokol qavatlarida, yerto‘la va chordoqlarida saqlamaslik.
Izoh (0)