Ўзбекистонда 2021 йил мобайнида жами 10 667 та ёнғинлар содир бўлиб, уларда 240 нафар фуқаро тан жароҳати олган ва 112 нафари ҳалок бўлган. Бу ҳақда АОКАда ўтказилган брифингда Фавқулодда вазиятлар вазирлиги ахборот хизмати бошлиғи ўринбосари Самандар Ҳикматуллаев маълум қилди.
Ушбу ёнғинларнинг 83 таси газ баллонларидан фойдаланишда хавфсизлик қоидаларининг бузилиши натижасида юзага келган бўлиб, шулардан 2 таси автомобилларда, 81 таси бино-иншоотларда содир бўлган. Натижада 5 нафар фуқаро вафот этган ва 22 нафар фуқаро тан жароҳати олган. Моддий зарар миқдори 1,12 миллиард сўмдан ортиқни ташкил этган.
Таъкидланишича, газ баллонлари билан боғлиқ ҳаёт учун хавф туғдирувчи вазиятларнинг олдини олиш ҳамда синовдан ўтказилмаган газ баллонларидан фойдаланиш орқали юзага келаётган оқибатларни кенг оммага етказиш бўйича барча масъул ташкилотлар томонидан кенг қамровли тарғибот тадбирлари олиб борилмоқда.
«Транспорт воситаларидан ечиб олинган фойдаланишга яроқсиз бўлган газ баллонларидан турар жойлар ҳамда маиший ва савдо объектларида фойдаланиш ҳолатлари учрамоқда», — дейди Ҳикматуллаев.
- газ баллонларидан фойдаланишда хавфсизлик қоидаларига ва газ идораси ходимлари томонидан берилган йўриқнома талабларига қатъий амал қилиш, газ балонини газ идорасининг лойиҳасида белгиланган жойдан бошқа жойга кўчирмаслик;
- турар жойлар, дала ҳовлилар ва ташкилотларнинг ҳудудидаги очиқ майдонлар ичида енгил алангаланувчи ва ёнувчи суюқликлар бўлган идишларни ҳамда сиқилган ва суюлтирилган газ билан тўлдирилган баллонларни қолдирмаслик;
- газ баллонлари ёнида очиқ оловдан фойдаланмаслик;
- газ тўлдирилган баллонларни сақлаш, ташиш ва фойдаланишда уларни қуёш нурлари ва бошқа иссиқлик манбалари таъсиридан ҳимояланишини таъминлаш;
- хоналарда ўрнатиладиган газ баллонларини иситиш радиаторлари ва бошқа иситиш асбоб-ускуналаридан камида 1 метр масофада, очиқ оловли иссиқлик манбаларидан эса камида 5 метр масофада бўлишига эътибор қаратиш;
- бир хонада кислород ва газ билан тўлдирилган баллонлар ҳамда кальций карбиди, бўёқлар, мойлар ва ёғларни сақламаслик;
- ёнувчи газ билан тўлдирилган баллонларни, енгил алангаланувчи ва ёнувчи суюқликларни якка тартибдаги ва кўп квартирали уйларнинг эвакуация йўлларида, сокол қаватларида, ертўла ва чордоқларида сақламаслик.
Изоҳ (0)