Oliy Majlis Qonunchilik palatasi sog‘liqni saqlash vaziri Behzod Musayevga koronavirus pandemiyasiga qarshi kurashish tadbirlari uchun ajratilgan mablag‘larning oqilona sarflanishi bo‘yicha amalga oshirilgan ishlar to‘g‘risida ma’lumot berishi uchun paralament so‘rovini yubordi. Bu haqda palata matbuot xizmati xabar berdi.
Ma’lumotlarga ko‘ra, 2021-yilda koronavirus pandemiyasiga qarshi kurashish va vaksina sotib olish xarajatlari uchun dastlab 3 trillion so‘m, 2021-yil 5-noyabrda qabul qilingan “2021-yil uchun O‘zbekiston Respublikasining ‘Davlat budjeti to‘g‘risida’gi qonuniga o‘zgartishlar kiritish haqida”gi qonun bilan qo‘shimcha ravishda 1,2 trillion so‘m, jami 4,2 trillion so‘m mablag‘ ajratilgan.
Shuningdek, koronavirusga qarshi kurashish tadbirlariga jalb qilingan tibbiyot xodimlarini va boshqa kasbdagi xodimlarni rag‘batlantirish xarajatlariga 1,4 trillion so‘m, dori-darmon vositalari, gigiyena va zararsizlantiruvchi vositalar uchun 604,2 milliard so‘m, bir marotabalik shaxsiy himoya uchun kombinezonlar, qo‘l va yuz niqoblari hamda boshqa xarajatlar uchun 89,5 milliard so‘m, oziq-ovqat mahsulotlariga 86,6 milliard so‘m ajratilgan.
Laboratoriya reagentlari, pirometrlar, test tizimlari va boshqa xarajatlarga 113,9 milliard so‘m, vaksina sotib olish uchun 1,32 trillion so‘m, emlash punktlarini tashkil etishga 9,8 milliard so‘m, Toshkent shahrida va Namangan viloyatida koronavirusga qarshi kurashish bo‘yicha tibbiyot markazlarini tashkil etish xarajatlariga 270,6 milliard so‘m va boshqa xarajatlar uchun 174,5 milliard so‘m ajratilgan.
Ammo Oliy Majlis Qonunchilik palatasiga Sog‘liqni saqlash vazirligi tomonidan 2021-yilning birinchi yarim yilligidagi faoliyat to‘g‘risida taqdim etilgan axborotda, shuningdek, Vazirlar Mahkamasi tomonidan davlat budjeti ijrosining borishi yuzasidan taqdim etilgan hisobotlarda, Moliya vazirligi taqdim etgan axborot va materiallarda koronavirus pandemiyasiga qarshi kurashish hamda vaksina sotib olish xarajatlari uchun ajratilgan mablag‘larning ishlatilishiga doir ma’lumotlar o‘z aksini topmagan.
Shuningdek, Qonunchilik palatasi Budjet va iqtisodiy islohotlar qo‘mitasining so‘rovi bo‘yicha ham Sog‘liqni saqlash vazirligi tomonidan zarur ma’lumotlar taqdim etilmagan.
Yuqoridagilardan kelib chiqib, majlisda Sog‘liqni saqlash vaziri Behzod Musayevga “2021-yil uchun O‘zbekiston Respublikasi Davlat budjetidan koronavirus pandemiyasiga qarshi kurashish tadbirlari uchun ajratilgan mablag‘larning oqilona sarflanishi bo‘yicha amalga oshirilgan ishlar to‘g‘risida” Qonunchilik palatasining parlament so‘rovini yuborish haqida qaror qabul qilingan.
2021-yilning noyabrida O‘zbekiston prezidentining tegishli farmoni bilan bosh vazir o‘rinbosari lavozimida ishlab kelgan Behzod Musayev sog‘liqni saqlash vaziri etib tayinlangandi. Avvalroq prezident Shavkat Mirziyoyev yig‘ilishda sog‘liqni saqlash tizimi haqida gapirar ekan, vazir Behzod Musayevga, eng avvalo, pastga tushib ishlash kerakligini ta’kidlagan edi. “Endi sen ham buni eplolmasang, O‘zbekistonda tibbiyotni hech kim eplolmaydi, yopish kerak vazirlikni”, — degandi davlat rahbari Behzod Musayevga qarata.
Izoh (0)