O‘zbekistonda boquvchisini yo‘qotganlik nafaqasini olish yoshi uzaytirildi

“Fuqarolarning va tadbirkorlik subyektlarining huquqlari kafolatlari yanada kuchaytirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun prezident tomonidan imzolandi. Bu haqda Telegram’dagi “Huquqiy axborot” kanali xabar berdi.

Kiritilgan qo‘shimchalarga muvofiq, nogironlik pensiyalari Chernobil AESdagi avariya oqibatida III guruh nogironi bo‘lgan shaxslarga ham to‘lanadi. Ilgari faqat I va II guruh nogironlariga to‘lanishi belgilangan.

Shuningdek, oilaning mehnatga qobiliyatsiz a’zolari (bolalar, aka-ukalar, opa-singillar va nabiralar) yoshi 18 yoshgacha etib belgilangan (ilgari 16 yoshgacha edi). O‘quvchilar va talabalar o‘qishi davomida, 23 yoshgacha boquvchisini yo‘qotganlik nafaqasini olishi mumkinligi belgilangan (ilgari 18 yoshgacha edi).

Bundan tashqari, bolani parvarishlash ta’tilining ish stajiga qo‘shiladigan davri 6 yil etib belgilangan (ilgari jami 3 yildan ko‘p bo‘lmagan davr kiritilgan).

Qonunga ko‘ra, avtomobillar elektron auksion orqali ijaraga berilganda shartnomani notarial tasdiqlash talab etilmaydi.

Shuningdek, quyidagilarning qo‘shilgan qiymat solig‘idan ozod qilish muddati 2022-yil 30-aprelgacha uzaytirilgan:

• O‘zbekistonga o‘simlik yog‘i, kungaboqar va zig‘ir urug‘i, shuningdek, soya danagini olib kirish;
• o‘simlik yog‘ini (paxta yog‘idan tashqari) ishlab chiqarish va (yoki) realizatsiya qilish bo‘yicha aylanma (ilgari 2021-yil 31-dekabrgacha edi).