2022-yil boshidan buyon O‘zbekistonda is gazi bilan bog‘liq 21 holatda 19 nafar fuqaro zaharlangan va 36 nafar fuqaro vafot etgan. Bu haqda AOKAda o‘tkazilgan brifingda Favqulodda vaziyatlar vazirligi axborot xizmati boshlig‘i o‘rinbosari Samandar Hikmatullayev ma’lum qildi.
Ma’lum qilinishicha, FVV tomonidan mavsum davomida yuzaga kelishi mumkin bo‘lgan favqulodda vaziyatlarning oldini olish va yong‘in xavfsizligini ta’minlash maqsadida jami 824 ta ishchi guruh tashkil etilib, ularga taalluqli idoralar vakillaridan 9 ming 58 nafar xodim jalb etilgan.
Tashkil etilgan ishchi guruhlar tomonidan joylarda mavjud bo‘lgan jami 9167 ta mahallalarda 50 mingga yaqin o‘rganishlar o‘tkazilgan. Ulardagi 38 608 ta ko‘p kvartirali uylardagi 1 million 810 ming 410 ta xonadon tekshirib chiqilgan, aniqlangan 168 ming 771 ta kamchilikdan 150 790 tasi (89,3 foiz) joyida bartaraf etilgan.
Mahallalarda olib borilgan tadbirlar davomida 37 254 ta xonadonda tabiiy gazdan va 22 690 ta xonadonda suyultirilgan gazdan foydalanishda xavfsizlik qoidalarini buzish holatlari aniqlanib, holatlar bartaraf etilgan. Shuningdek, 21 075 ta nostandart isitish pechlaridan foydalanish holatlari aniqlanib, ularning 20 476 tasi olib tashlangan.
Shunga qaramasdan, respublika hududida 2021-yilda is gazi bilan bog‘liq jami 74 ta holat aniqlanib, ushbu holatlarda 67 nafar fuqaro zaharlangan va 128 nafar fuqaro vafot etgan bo‘lsa, 2022-yilning 9-fevral holatiga ko‘ra, 21 holatda 19 nafar fuqaro zaharlangan va 36 nafar fuqaro vafot etgan.
- fuqarolar tomonidan gaz va muqobil yoqilg‘i (ko‘mir, o‘tin va boshqa) turlaridan foydalanishda xavfsizlik choralariga rioya etmaslik;
- nostandart (qo‘lbola yasalgan) yoki sertifikatga ega bo‘lmagan isitish pechlari va anjomlaridan foydalanish;
- isitish pechlarining dudbo‘ronlarini noto‘g‘ri o‘rnatish;
- gaz yoki boshqa muqobil yoqilg‘iga moslashtirilgan isitish pechlari (anjomlari)ni dam olish (uxlash) xonalariga olib kirish;
- havo almashmaydigan xonalarni isitishda ochiq olov (ko‘mir va o‘tin cho‘g‘lari)dan foydalanish;
- havoni almashtiruvchi shamollatish shaxtalari yoki tuynuklarni berkitib (to‘sib) qo‘yish shular jumlasidan.
Ushbu yong‘inlarning 83 tasi gaz ballonlaridan foydalanishda xavfsizlik qoidalarining buzilishi natijasida yuzaga kelgan bo‘lib, shulardan 2 tasi avtomobillarda, 81 tasi bino-inshootlarda sodir bo‘lgan. Natijada 5 nafar fuqaro vafot etgan va 22 nafar fuqaro tan jarohati olgan. Moddiy zarar miqdori 1,12 milliard so‘mdan ortiqni tashkil etgan.
Avvalroq Samarqandda to‘rt kishining is gazidan zaharlanib vafot etgani yuzasidan jinoyat ishi qo‘zg‘atilgani, Xorazmdagi choyxonada bir oilaning uch a’zosi is gazidan zaharlanib vafot etgani, Kattaqo‘rg‘onda is gazidan oilaviy zaharlanish oqibatida uch nafar bola halok bo‘lgani to‘g‘risida xabar berilgandi.
Izoh (0)