Rossiya hukumati Suriyaga 200 nafargacha Belarus harbiy kontingentini joylashtirish bo‘yicha muddatsiz kelishuv loyihasini ma’qulladi. Hujjat huquqiy axborotning rasmiy portalida e’lon qilingan.
Kelishuv loyihasiga ko‘ra, Belarus kontingenti jangovar harakatlar zonasidan tashqaridagi gumanitar tadbirlarda ishtirok etadi, ular Rossiya aviatsiya guruhi joylashgan hududga — Xmeymim aviabazasiga yuboriladi.
Belarus guruhining tarkibi va vazifalari Belarus hukumati tomonidan Rossiya bilan kelishgan holda tasdiqlanadi. Harbiylar Rossiya Mudofaa vazirligining nizolashayotgan tomonlarni yarashtirish markaziga bo‘ysunadi, biroq Belarus Mudofaa vazirligining qo‘mondonligi ostida qoladi.
Rossiya Belarus harbiylarini oziq-ovqat, transport, kiyim-kechak, texnik va moddiy vositalar, qurol-yarog‘, harbiy texnika va o‘q-dorilar bilan “beg‘araz” ta’minlaydi, shuningdek, ularni o‘qitadi va xavf tug‘ilganda ularni Suriyadan evakuatsiya qilishni tashkil etadi.
Mazkur bitimning tuzilishiga do‘stlik, harbiy hamkorlik va Ittifoq davlatini yaratish to‘g‘risidagi Rossiya—Belarus shartnomalari asos bo‘lib xizmat qilgan.
“Zerkalo” nashrining yozishicha, Belarus prezidenti Aleksandr Lukashenko ilgari Belarus harbiylarini Suriyaga yubormasligini, bunga mamlakat konstitutsiyasi yo‘l qo‘ymasligini ta’kidlagan. “Suriyada eronlar, amerikaliklar, turklar va ruslar orasiga tiqilishga unchalik xohishim yo‘q. Men hatto bu haqida gapirishdan qo‘rqaman va sizlarning orqangizdan kelishib olib, ertaga kontingentni yuborishim haqida gap ham bo‘lishi mumkin emas”, — degan u 2019-yilda.
Avvalroq prezident Aleksandr Lukashenko teleboshlovchi Vladimir Solovyovga bergan intervyusida Ukraina “Donbassga qarshi urush boshlasa”, Belarus armiyasi xuddi Rossiya armiyasi kabi harakat qilishini ma’lum qilgandi.
Izoh (0)