Avstraliya 21-fevraldan boshlab chet elliklar, jumladan, koronavirusga qarshi to‘liq emlanganlar uchun o‘z chegaralarini ochadi. Bu haqda mamlakat bosh vaziri Skott Morrison ma’lum qildi, deb xabar beradi ABC News.
“Shart shundayki, siz mamlakatga kelishdan oldin ikkita emlanishni olgan bo‘lishingiz kerak. Qoida shunaqa va umid qilamizki, unga barcha rioya qiladi”, — deydi Morrison.
Tibbiy sabablarga ko‘ra koronavirusga qarshi emlanmaydigan xorijliklar mamlakatga kirish uchun alohida tartibda ruxsat olishi lozim bo‘ladi. Agar ularga ruxsat berilsa, Avstraliyaga kelganidan so‘ng ikki haftalik karantinni o‘taydi.
Avvalroq Avstraliya terapevtik mahsulotlar boshqarmasi (TGA) “Sputnik V” vaksinasining ikkala dozasi bilan emlangan fuqarolar mamlakatga kirish huquqiga ega ekanini ma’lum qilgandi.
Avstraliyada pandemiya davrida chegarani kesib o‘tish bo‘yicha eng qattiq cheklov choralari qo‘llanildi. 2020-yilning martida mamlakat o‘z fuqarolari va doimiy rezidentlaridan boshqa barcha uchun chegaralarini yopdi. Bundan tashqari, avstraliyaliklarga mamlakatni tark etish va xorijdan qaytish cheklandi.
Avstraliya cheklovlarni 2021-yil noyabrdan boshlab yechishni boshladi. Avvaliga koronavirusga qarshi emlangan mamlakat fuqarolari va rezidentlariga xorijga erkin chiqish va qaytish imkoni berildi. Keyinroq emlangan xorijlik talabalar, malakali ishchilar va boshqa qatori toifadagi vizalarga ega insonlarga, shuningdek, Yaponiya va Janubiy Koreyadan keladigan turistlarga chegaralar ochildi.
Avstraliyada butun pandemiya davrida 2,3 million kishida koronavirus aniqlangan va 4,2 ming kishi infeksiya asoratlari oqibatida vafot etgan (mamlakat aholisi salkam 26 millionga teng). Aholining 16 yoshdan katta bo‘lgan 93,7 foizi koronavirusga qarshi to‘liq emlangan.
Yanvar oyida jahonning birinchi raqamli tennischis Novak Jokovich koronavirusga qarshi emlanmagani uchun Avstraliyadan deport qilingandi. U Australian Open musobaqasiga koronavirusga qarshi emlanmasdan kelgan va buni dekabr oyida COVID-19 dan tuzalgani bilan izohlagan. Avstraliya hukumati tennischini “mamlakatga kirish uchun ishonchli dalillarni taqdim etmadi”, deya hisoblagan.
Izoh (0)