Россия ҳукумати Сурияга 200 нафаргача Беларусь ҳарбий контингентини жойлаштириш бўйича муддатсиз келишув лойиҳасини маъқуллади. Ҳужжат ҳуқуқий ахборотнинг расмий порталида эълон қилинган.
Келишув лойиҳасига кўра, Беларусь контингенти жанговар ҳаракатлар зонасидан ташқаридаги гуманитар тадбирларда иштирок этади, улар Россия авиация гуруҳи жойлашган ҳудудга — Хмеймим авиабазасига юборилади.
Беларусь гуруҳининг таркиби ва вазифалари Беларусь ҳукумати томонидан Россия билан келишган ҳолда тасдиқланади. Ҳарбийлар Россия Мудофаа вазирлигининг низолашаётган томонларни яраштириш марказига бўйсунади, бироқ Беларусь Мудофаа вазирлигининг қўмондонлиги остида қолади.
Россия Беларусь ҳарбийларини озиқ-овқат, транспорт, кийим-кечак, техник ва моддий воситалар, қурол-яроғ, ҳарбий техника ва ўқ-дорилар билан «беғараз» таъминлайди, шунингдек, уларни ўқитади ва хавф туғилганда уларни Суриядан эвакуация қилишни ташкил этади.
Мазкур битимнинг тузилишига дўстлик, ҳарбий ҳамкорлик ва Иттифоқ давлатини яратиш тўғрисидаги Россия—Беларусь шартномалари асос бўлиб хизмат қилган.
«Зеркало» нашрининг ёзишича, Беларусь президенти Александр Лукашенко илгари Беларусь ҳарбийларини Сурияга юбормаслигини, бунга мамлакат конституцияси йўл қўймаслигини таъкидлаган. «Сурияда эронлар, америкаликлар, турклар ва руслар орасига тиқилишга унчалик хоҳишим йўқ. Мен ҳатто бу ҳақида гапиришдан қўрқаман ва сизларнинг орқангиздан келишиб олиб, эртага контингентни юборишим ҳақида гап ҳам бўлиши мумкин эмас», — деган у 2019 йилда.
Аввалроқ президент Александр Лукашенко телебошловчи Владимир Соловёвга берган интервьюсида Украина «Донбассга қарши уруш бошласа», Беларусь армияси худди Россия армияси каби ҳаракат қилишини маълум қилганди.
Изоҳ (0)