Germaniya tashqi ishlar vaziri Annalena Berbok va Ukraina prezidenti Vladimir Zelenskiyning uchrashuvi nemis tomonining Kiyevga harbiy yordam ko‘rsatishni istamayotgani tufayli bekor qilindi. Bu haqda o‘z manbalariga tayanib, CNN telekanali xabar berdi.
Ukraina hukumatiga yaqin bo‘lgan manbaning so‘zlariga ko‘ra, Germaniya tashqi ishlar vaziri Rossiya Ukrainaga “bostirib kirsa”, Germaniya “Shimoliy oqim-2” gaz quvuridan voz kechadimi degan savolga javob bermagan.
Bundan tashqari, uning qo‘shimcha qilishicha, uchrashuv “Germaniya Kiyevga bevosita yoki bilvosita biror-bir harbiy yordam ko‘rsatishni rad etgani” sabab bekor qilingan.
“Sharqiy Yevropa va Kiyevda ko‘pchilik Germaniyani G‘arbning emas, balki Rossiyaning ittifoqchisi sifatida ko‘rishni boshlagan. Ular ham o‘zini shunday tutmoqda — sobiq kansler Shrederga qarang”, — deydi telekanal suhbatdoshi.
Shu bilan birga, Germaniya kansleri Olaf Shols Zelenskiyning Berbok bilan uchrashishni istamagani to‘g‘risida hech narsa bilmasligini ma’lum qilgan. “U Kiyevda. Men uni yubordim. U front chizig‘iga borib, vaziyatni baholaydi”, — deya qo‘shimcha qiladi u.
Shols, shuningdek, Germaniya ittifoqchilari AQSh, NATO va YeI bilan “Rossiyaning bosqini” amalga oshsa, ko‘riladigan choralar bo‘yicha aniq vazifalarni mustahkamlash ustida ish olib borayotganini aytgan.
Ayni vaqtda Shols Vashingtonda bo‘lib turibdi. Bu uning Germaniya kansleri sifatida Vashingtonga birinchi tashrifi hisoblanadi.
Avvalroq Kansler Olaf Shols Germaniya Ukrainaga halokatli qurollarni yetkazib berish niyatida emasligini aytgandi. Shuningdek, The New York Times manbalariga tayanib, Rossiya Ukraina hududiga bostirib kirishga hali tayyor emasligi, ammo harbiy operatsiyaga tayyorgarlikning yakuniy bosqichida ekani haqida xabar bergandi.
Bir necha oydan buyon G‘arb siyosatchilari va ommaviy axborot vositalari Rossiya Ukraina bilan chegarasi yaqinida harbiy kuchlar to‘playotgani haqida xabar bermoqda, ularning fikricha, bu bosqinga tayyorgarlik bo‘lishi mumkin. Agar Ukrainaga hujum bo‘lsa, G‘arb davlatlari Rossiyaga qarshi sanksiyalar qo‘llamoqchi.
Izoh (0)