“Ular meni reklama qilib, keyin qimmatroqqa sotib yubormoqchi bo‘lgan”. Ja’far Irismetovning “Spartak”dagi omadsiz faoliyati haqida

O‘zbek futbol muxlislari Ja’far Irismetovni Rossiya va Qozog‘iston chempionatida o‘ynagan va to‘purarlik mahoratini ko‘rsatgan hujumchi deb biladi. Haqiqatan ham faoliyatining katta qismini xorijda o‘tkazgan futbolchi yomon natijalarga erishmagan. Rossiyaning “Chempionat” nashri Irismetovning 2001-yilda qay tariqa “Spartak”ka o‘tgani haqida hikoya qildi.

O‘zbek yulduzi 2001-yilda “Spartak”da paydo bo‘ladi. Yanvar oyida Moskva klubi to‘purar hujumchi Ja’far Irismetovni “Do‘stlik”dan sotib oladi. U 25 yoshgacha O‘zbekiston chempionati darajasida yuzdan ortiq gol urishga muvaffaq bo‘lgandi. Umuman olganda bu yomon natija hisoblanmaydi. Klub ushbu transfer orqali hujum chizig‘ini kuchaytirishni xohlagandi. Bu, ayniqsa, Chempionlar Ligasining ikkinchi guruh bosqichi oldidan juda muhim edi. O‘shanda shunday bosqich bo‘lardi. Ammo transfer o‘zini oqlamagan. Ja’far o‘yin jihatidan ham, ruhiy jihatdan ham “Spartak”ka mos kelmasdi.

Oleg Romansev o‘zini Irismetovni tanimaganday qilib ko‘rsatgan, keyinchalik esa tanlovini tushuntirgan

Forvard O‘zbekistonda g‘ayritabiiy ravishda ko‘p gol urardi. 2000-yilgi mavsumda — 37 o‘yinda 45 ta gol. Tabiiyki, bu haqdagi ma’lumotlar Rossiyaga ham yetib boradi. “Spartak”ning ikkinchi murabbiyi Vyacheslav Grozniy “Do‘stlik” bilan bog‘lanib, Ja’farni ko‘rikka taklif qiladi. Irismetov o‘shanda unga Rossiyadan boshqa takliflar ham bo‘lganini, ammo afsonaviy klubga rad javobini bera olmaganini aytgandi. Futbolchi mashg‘ulotlarda qatnashish uchun Isroilga uchib boradi. Hammasi odatdagidek: mashg‘ulotdagi ikki tomonlama (dvuxstoronka) o‘yinda ishtirok etib, to‘rtta gol uradi. Bu o‘z navbatida bosh murabbiyda iliq taassurot qoldiradi.

“Mashg‘ulotdan keyin Romansev yoniga chaqirib, ‘Sen kimsan?’ deb so‘radi. ‘Irismetov, O‘zbekistondanman’, dedim. Keyin ‘Yaxshi o‘ynarkansan’, dedi. U meni tanigan bo‘lsa kerak. Balki shunday tanishishga qaror qilgandir”, — degandi Ja’far oradan yillar o‘tib “Chempionat”ga bergan intervyusida.

Keyin Hamdo‘stlik Kubogi bo‘lib o‘tdi va unda “Spartak” bilan shartnomasi bo‘lmagan Irismetov bir qancha gollar urdi. Qizig‘i shundaki Kiyevning “Dinamo”si ham ushbu vaziyatdan unumli foydalanishga harakat qilib, futbolchiga foydali taklif bilan murojaat qilgandi. Hatto “Spartak”ning taklifidan ham yaxshiroq. Ammo “Do‘stlik” rahbariyati futbolchini Moskvaga sotishga va’da bergandi. Va oxir-oqibat futbolchi “Spartak” bilan to‘rt yillik shartnoma imzoladi, Oleg Romansev esa matbuot anjumanida ushbu transferga falsafiy izoh berdi: “Uning ikkita yo‘li bor edi: yo O‘zbekistonda, ‘qishloqning birinchi raqamlisi’ bo‘lish yoki Chempionlar Ligasida ikkinchi, uchinchi, beshinchi, o‘ninchi bo‘lish. Unga shunday savol berdim: yo o‘z vataningda 45 ta gol urasan, yoki 10—15 gol, lekin “Spartak”da. U ikkinchisini tanladi”.

Chempionlar Ligasidagi ishonch va rahbariyatning haqiqati

Moskva, Chempionlar Ligasi, shahar markazidan ijaraga olingan kvartira. Ajoyib debyut uchun yana nima kerak? Irismetov esa bu savolga hamon javob topa olmagan. Hujumchi Romansevni shunchalik hayratda qoldirdiki, uni birinchi rasmiy o‘yinda, “Bavariya”ga qarshi asosiy tarkibda maydonga tushirdi. Ja’far, albatta, yomon o‘yin ko‘rsatmadi, ammo “Spartak” mag‘lubiyatga uchradi — 0:1. Oradan bir hafta o‘tib, nemislar bilan ikkinchi o‘yinda ham o‘zbekistonlik yana boshlang‘ich tarkibdan joy oldi. Bu safar vaziyat yanada yomonlashdi — Ja’far juda qulay imkoniyatni golga aylantira olmadi. “Spartak” 0:3 hisobida mag‘lub bo‘ldi.

Keyingi bahs Londonning “Arsenal”iga qarshi kechdi. Romansev o‘jarlik bilan Irismetovni tarkibga kiritishda davom etardi, ammo navbatdagi mag‘lubiyat va samarasiz harakatlar. Londonliklar 1:0 hisobida g‘alaba qozondi. Futbolchi keyinchalik kiyim almashtirish xonasida shunday gap bo‘lganini aytgandi: “Londonda ‘Arsenal’ bilan o‘ynaganimizda, hatto Romansev ham tanaffusda: ‘Nega unga pas bermayapsizlar?’ deb baqirgandi. O‘shanda bu nima ekanligini tushunmagandim, lekin vaqt o‘tishi bilan angladimki, raqobat degan narsa bor ekan. Begona edim, O‘zbekistondan kelganman, hech kimni tanimasdim, hech qanday kompaniyaga qo‘shilib keta olmaganman”.

Irismetov Chempionlar Ligasining so‘nggi turida “Lion”ga qarshi o‘ynaganidan keyin Rossiya chempionatida 8 ta o‘yin o‘tkazdi. Yozga kelib, u zaxiradan ham tushirilmay qo‘ydi. 12 o‘yinda 0 gol. Shartnoma imzolanayotgan vaqtda o‘zbekistonlik hujumchidan bunday natija kutilmagandi. Murabbiylar shtabi matbuotni Irismetovda ruhiy muammolar borligi va shuning uchun u Rossiyada gol ura olmayapti deb ishontirardi. Bundan esa faqat Irismetov zarar ko‘rardi. Ja’far Romansev u bilan gaplashishdan bosh tortganini va doimiy ravishda texnik direktor Aleksandr Shikunovning yoniga yuborganini eslaydi.

Shikunov Chempionlar Ligasi oldidan sotib olinganimni va meni reklama qilib, keyinroq qimmatroqqa sotib yuborishni xohlashganini aytgandi. Ular meni Rossiya chempionatida o‘ynatmoqchi bo‘lmagan, chunki “Spartak” tarbiyalanuvchisi bo‘lmaganman. Menga ikkinchi imkoniyat berilmadi. Uch yildan so‘ng sotib olingan Fernando Kavenagidan deyarli bir yil davomida gol kutilgandi. Unga imkoniyat berildi va u nimaga qodirligini ko‘rsatdi. Mendan esa deyarli darhol voz kechildi.

Ja’far Irismetov

Yozda “Spartak” hujumchini transferga qo‘ydi. Avvaliga Belarusga ijaraga berildi, keyin esa “Anji”da paydo bo‘ldi.

10 yildan so‘ng Irismetov milliy chempionatlarning to‘purarlar ro‘yxatida to‘qqizinchi o‘rinni egalladi (faoliyatini davom ettirganlar orasida). 2012-yil boshida uning hisobida 428 uchrashuvda 239 ta gol bor edi. Gollarning aksariyat qismi Qozog‘iston va O‘zbekiston chempionatlariga to‘g‘ri keladi. 2013-yilda esa Ja’far futbolchilik faoliyatini yakunladi. Hozirda u “Paxtakor” sport direktori sifatida ishlab kelmoqda.