Dani Alves “Barselona” safida gol urgan eng yoshi katta futbolchiga aylandi

“Barselona” himoyachisi Dani Alves La Liganing 23-tur doirasidagi “Atletiko”ga qarshi o‘yinda (4:2) gol urdi.

Braziliyalik futbolchi 38 yosh-u 276 kunlik vaqtida o‘z nomiga gol yozdirib qo‘ydi va shu tariqa kataloniyaliklar tarixidagi eng yoshi katta gol muallifiga aylandi.

Bundan avvalgi natija Xoan Segarrega tegishli edi. 1963/64-yilgi mavsumda “Betis” darvozasini ishg‘ol qilgan Segarre 36 yosh-u 163 kunlik edi.

“Barselona” “Atletiko”ni mag‘lub etgan bahsda Dani Alves Xordi Albaning goliga assistentlik qildi, shuningdek, u o‘z hisobiga ham gol yozdirib qo‘ydi. 69-daqiqada esa qizil kartochka olib, maydonni tark etdi.

Eslatib o‘tamiz, Dani Alves 2021-yilning noyabr oyida 5 yillik tanaffusdan keyin erkin agent sifatida “Barselona”ga qaytgandi. U 2021/22-yilgi mavsumda “Barselona” safida barcha musobaqalarda 5 o‘yin o‘tkazib, bitta gol va uchta golli uzatmaga mualliflik qildi.