Toshkentda avtomobil siqib ketgan avtobus ustunga urildi, Farg‘onada Lacetti yo‘ldan chiqib ketdi. YTHlar tafsilotlari

O‘zbekiston yo‘llarida so‘nggi kunlarda sodir bo‘lgan yo‘l-transport hodisalari tafsilotlarini taqdim etamiz.

Yengil avtomobil siqib ketgan avtobus ustunga urildi

2022-yilning 6-fevral kuni ertalab soat 06:37 atrofida “12-avtobus saroyi” filiali tasarrufidagi, davlat raqami 01 125 BDA bo‘lgan 59-sonli yo‘nalishda harakatlanuvchi Isuzu rusumli avtobus haydovchisi X.Y. (1966-yilda tug‘ilgan, ish tajribasi 33 yil), Yangihayot tumani hududidagi Yangi katta halqa avtomobil yo‘li bo‘ylab harakatlanib borayotgan vaqtda “Simma” mehmonxonasi qarshisida yengil avtomobil siqib ketishi oqibatida yo‘l chetiga chiqib ketgan va old yon tomoni bilan ustunga borib urilgan.

Dastlabki ma’lumotlarga ko‘ra, ushbu yo‘l-transport hodisasi oqibatida ikki nafar yo‘lovchi yengil tan jarohati olgan, shuningdek, jabrlangan yo‘lovchilar shifoxonaga yetkazilib, tez tibbiy yordam ko‘rsatilgan.

Hozirda mazkur yo‘l-transport hodisasi Yo‘l harakati xavfsizligi boshqarmasi xodimlari tomonidan rasmiylashtirilgan hamda “Toshshahartransxizmat” aksiyadorlik jamiyatining Yo‘lovchi transportida harakat xavfsizligini nazorat etish boshqarmasi xodimlari tomonidan xizmat surishtiruvi o‘tkazilmoqda.

Farg‘onada Lacetti boshqaruvni yo‘qotib, yo‘ldan chiqib ketdi

2022-yil 7-fevral kuni soat 10:00 larda Farg‘ona viloyati, Oltiariq tumani hududidan o‘tuvchi 4P-148A avtomobil yo‘lining 3-kilometrida haydovchi Sh.A. Lacetti rusumli avtomobilda harakatlanayotib, rul boshqaruvini yo‘qotishi oqibatida transport vositasi yo‘ldan chiqib ketib, YTH yuzaga kelgan.

Hodisa oqibatida tan jarohati olgan fuqarolar yo‘q.

Mazkur YTH yuzasidan Farg‘ona viloyati IIB YHXB xodimlari tomonidan surishtiruv harakatlari olib borilmoqda.