Qashqadaryo viloyati Chiroqchi tumanida 7-fevral kuni “KamAZ” yuk mashinasida yong‘in yuzaga keldi. Bu haqda Yo‘l harakati xavfsizligi xizmati xabar qildi.
Qayd etilishicha, holat shu kuni soat 13:30 atrofida tumanning “Sho‘rquduq” mahallasi Torjilg‘a qishlog‘idan o‘tgan Samarqand—G‘uzor avtomobil yo‘lida joylashgan gaz to‘ldirish shoxobchasida sodir bo‘lgan. Haydovchi gaz to‘ldirish vaqtida xavfsizlik qoidalariga rioya qilmay, ulagich uzilmasidan avval “KamAZ-53212” yuk avtomobilini harakatga keltirgan. Oqibatda avtomobilda yong‘in yuzaga kelgan.
Favqulodda vaziyatlar vazirligi bergan ma’lumotga ko‘ra, holatni bartaraf etishga 2 ta yong‘in-qutqaruv ekipaji jalb etilgan. Qutqaruvchilar voqea joyiga 7 daqiqada yetib borib, yong‘in 11 daqiqada o‘chirilgan.
Yong‘inda yuk mashinasining salon va bort qismi yonib zararlangan. Hodisa oqibatida tan jarohati olgan fuqarolar yo‘q.
Hozirda tuman FVB va YHXB xodimlari tomonidan surishtiruv ishlari olib borilmoqda. Yong‘in sababi va moddiy zarar miqdori aniqlanmoqda.
Izoh (0)