Shavkat Mirziyoyev 7-fevral kuni bir nechta qurilish loyihalari taqdimoti bilan tanishdi. Bu haqda Prezident matbuot xizmati xabar qildi.
Qayd etilishicha, Samarqand viloyatida Imom Buxoriy majmuasi yangidan qurilmoqda. Uning qurilishi o‘tgan yili Ramazon oyida boshlangan. Bugungi kunda binolar ko‘tarilib, pardozlash ishlariga oz fursat qolgan. Taqdimotda majmuaning ichki va tashqi ko‘rinishiga oid chizmalar ko‘rib chiqilgan.
Unga ko‘ra, majmua devorlari milliy naqshlar, pardozbop toshlar bilan sayqallanadi. Imom Buxoriy maqbarasida naqqoshlik va xattotlik san’ati uyg‘unlashadi. Uning devorlariga qadimiy uslubda Qur’oni karim suralari va hadislar yoziladi. Barcha pardozlash ishlarida yorqin, “issiq” ranglardan ko‘proq foydalaniladi.
Xorazm viloyati Urganch shahrida Al-Xorazmiy shaharchasi qurilishi rejalashtirilgan. Loyihaga ko‘ra, u yerda universitet, maktab va bog‘cha, IT-park, fan va madaniyat markazlari, sport majmuasi barpo etiladi. Shaharcha markazida Muhammad al-Xorazmiy maydoni bo‘ladi, allomaning yangi haykali o‘rnatiladi.
Urganch shahrida Jaloliddin Manguberdi majmuasi ham qurilmoqda. Bugungi kunda sarkardaning haykali o‘rnatilgan. Atrofdagi qariyb 8 gektar maydon obodonlashtirilmoqda.
Shunga yaqin joyda ming o‘rinli san’at saroyi bunyod etish ham mo‘ljallangan. U yerda Xorazm lazgisi an’analarini saqlash, o‘rganish va keng yoyish uchun zamonaviy sharoit yaratiladi. Turli tadbirlar, konsertlar o‘tkaziladi.
2020-yil 22-oktabrda “Harbiy tibbiyot sohasida kadrlarni tayyorlashning sifat jihatidan yangi tizimini tashkil etish chora-tadbirlari to‘g‘risida” prezident qarori qabul qilingan edi. Unga muvofiq, Qurolli Kuchlar harbiy tibbiyot akademiyasi tashkil etilgan.
Qarorda mazkur akademiya uchun yangi binolar qurish va o‘quv-moddiy bazasini takomillashtirish bo‘yicha vazifalar belgilangan. Taqdimotda shu boradagi loyihalar haqida ham axborot berilgan. Unga ko‘ra, o‘quv va davolash binolari, yotoqxona, xizmat uyi qurilib, mavjud obyektlar ta’mirlanadi, hudud obodonlashtiriladi.
Prezident loyihalarni takomillashtirish va sifatli qurish yuzasidan ko‘rsatmalar bergan.
Shuningdek, Toshkent shahrining Yashnobod tumanida Olimpiya shaharchasi qurilishi rejalashtirilgan. 160 gektarni egallaydigan mazkur shaharchada universal stadion, ochiq va yopiq sport majmualari, yotoqxona, mehmonxona, Chirchiq daryosida eshkak eshish havzasi barpo etiladi. Bu infratuzilma yirik musobaqalar o‘tkazish va bo‘lajak Olimpiya zaxiralari instituti uchun o‘quv-mashg‘ulot bazasi bo‘ladi.
Toshkent viloyatining Bo‘stonliq tumanida “Chorvoq” turistik-rekreatsion zonasi tashkil etilmoqda. Prezidentga shu boradagi ishlar haqida ham ma’lumot berilgan.
Unga ko‘ra, Chorvoq suv ombori va Chirchiq daryosi bo‘yida ekoturizm obyektlari barpo etiladi. Buning avvalo qulay transport tizimi yo‘lga qo‘yiladi. “Chorvoq darvozasi” va “Yusufxona” hududlarida dam olish joylari, Janubiy Xo‘jakentda an’anaviy tog‘ qishlog‘i barpo etiladi. Hududning xushmanzara tabiati va relyefini saqlab qolishga alohida e’tibor qaratiladi. Bog‘lar, piknik joylari, velosiped yo‘laklari tashkil qilinadi. Shunday loyiha Chimyon hududida ham rejalashtirilgan.
Davlat rahbari bu majmualar ommabop bo‘lishi zarurligini ta’kidlab, barcha fuqarolar, turli kasb egalariga mos arzon va qulay xizmatlar taklif etish vazifasini qo‘ygan.
Toshkent shahrini yondosh hududga kengaytirish, yangi quriladigan mavzelarni infratuzilma va transport xizmatlari bilan ta’minlash bo‘yicha loyiha konsepsiyasi ham ko‘rib chiqilgan.
Izoh (0)