AOKAda 7-fevral kuni o‘tkazilgan brifingda “O‘zsuvta’minot” AJ axborot xizmati rahbari Akmal Murodov 2021-yilda aholi punktlarida ichimlik suv ta’minoti va oqova suv chiqarish tizimlarini rivojlantirish bo‘yicha amalga oshirilgan ishlar haqida ma’lumot berdi.
Qayd etilishicha, bugungi kunda respublika aholisining markazlashgan ichimlik suvi bilan ta’minlanganlik darajasi 69,7 foizni tashkil etmoqda. 30,3 foiz aholi ichimlik suvi bilan ta’minlanishda muqobil suv manbalaridan foydalanadi. Shu jumladan, 9 foiz aholiga ichimlik suvi maxsus suv tashuvchi transport vositalari orqali yetkazib beriladi. Bular, asosan, ichimlik suvi manbai bo‘lmagan hududlar hisoblanadi.
2021-yilda aholi punktlarida ichimlik suvi ta’minoti va oqova suv chiqarish tizimlarini rivojlantirish maqsadida 649 ta obyektda qurish va rekonstruksiya ishlarini amalga oshirilgan. Bu uchun jami 2 trillion 328,7 milliard so‘m miqdorda mablag‘ o‘zlashtirilgan.
Ushbu mablag‘lar hisobidan 5,3 ming kilometr ichimlik va 303,2 kilometr oqova suv tarmoqlari tortilgan. 474 ta ichimlik va oqova suv inshootida qurish hamda rekonstruksiya qilish ishlari bajarilgan.
Xususan, prezidentning 2021-yil 2-apreldagi “Obod qishloq” va “Obod mahalla” dasturlarini amalga oshirish bo‘yicha qo‘shimcha chora-tadbirlar to‘g‘risidagi qarori ijrosi doirasida 944 milliard so‘m mablag‘ o‘zlashtirilgan. Har bir mahallaning o‘ziga xos xususiyatlari, ichimlik suvi bilan ta’minlanganlik va oqova suv xizmatlari bilan qamrab olinganlik darajasi tahlil qilingan. 352 ta mahallada 3 890,9 kilometr ichimlik va 77,7 kilometr oqova suv tarmoqlarini qurish hamda rekonstruksiya qilish ishlari amalga oshirilgan. 278 ta obyekt foydalanishga topshirilgan.
2020-yil 1-yanvar holatiga ko‘ra, ichimlik suvi bilan to‘liq ta’minlangan mahallalarning soni 2841 tani tashkil etgan. Bugungi kunga kelib bunday mahallalarning soni 3829 tani ko‘rsatmoqda. So‘nggi ikki yilda ichimlik suvi bilan to‘liq ta’minlangan mahallalarning soni 35 foizga, ya’ni 988 taga oshgan.
Shuningdek, o‘tgan yilda Orolbo‘yi mintaqasini rivojlantirish maqsadida 97 milliard so‘m miqdorda mablag‘ o‘zlashtirilib, 52 ta ichimlik va oqova suv obyektlarida qurilish va rekonstruksiya ishlari amalga oshirilgan. Mablag‘lar hisobidan 372,3 kilometr ichimlik va 7,1 kilometr oqova suv tarmoqlari qurilgan va rekonstruksiya qilingan. 40 ta obyekt foydalanishga topshirilgan.
2021-yilda amalga oshirilgan ishlar natijasida 1,5 million nafar aholi ilk bor markazlashgan ichimlik suv bilan ta’minlangan. 2,3 million nafar aholining ichimlik suvi ta’minoti yaxshilangan.
Izoh (0)