АҚШ президенти Жо Байден франциялик ҳамкасби Эммануэль Макрон билан телефон орқали мулоқот қилди, дейилади Оқ уй сайтида.
Давлат раҳбарлари «Украина чегарасида Россия ҳарбий кучларининг оширилишига жавобан давом этаётган дипломатия ва олдини олиш чораларини» муҳокама қилди. Улар ўзаро, шунингдек, «иттифоқчилар ва ҳамкорлар, жумладан, Украина» билан алоқаларни давом эттиришга келишиб олди.
Байден ва Макрон охирги марта 2 февраль куни қўнғироқлашган эди. Ўшанда улар «дипломатия соҳасида, Россия Украинага бостириб кирган тақдирда унга тез ва жиддий иқтисодий зарба беришга тайёргарлик кўриш бўйича давом этаётган мувофиқлик масалаларини кўриб чиққан.»
Макрон 7 февраль куни Москвага келади ва Россия президенти Владимир Путин билан музокаралар ўтказади.
Россия президенти матбуот котиби Дмитрий Песков Франция раҳбарининг бўлажак ташрифини «жуда муҳим» деб атади, унинг сўзларига кўра, кун тартибида кўплаб мавзулар бор. Макроннинг айтишича, муҳокаманинг асосий мавзуси Россия—Украина чегарасидаги вазият юзасидан кескинликни юмшатиш бўлади.
Макрон ва Путин ўртасидаги музокаралардан сўнг қўшма конференция ўтказилади, — деди Песков.
Учрашув арафасида Франция ва Россия президентлари бир неча бор телефон орқали гаплашиб, Украина атрофидаги вазият ҳамда Москва томонидан АҚШ ва НАТОга тақдим этилаётган хавфсизлик кафолатларини муҳокама қилган.
Путин Франция президентига Ғарб Россиянинг хавфсизлик бўйича таклифларига жавобан эътиборсиз қолдирган мавзуларни санаб ўтди: альянснинг шарққа кенгайишига йўл қўймаслик, Россия чегаралари яқинида зарба берувчи қурол тизимларини жойлаштирмаслик ва НАТОнинг 1997 йилдаги позицияларига қайтиши каби.
Макрон Москвага сафаридан сўнг Киевга боради ва у ерда Украина президенти Владимир Зеленский билан учрашади.
Изоҳ (0)