Peru bosh vaziri Ektor Valer Pinto uydagi zo‘ravonlik ayblovlari tufayli iste’foga chiqishini ma’lum qildi. U mazkur lavozimda uch kun ishladi, deb yozmoqda “TASS”.
“Men o‘ta o‘ngchilarga aloqador Peru gazetalari tomonidan yetkazilgan mag‘lubiyatni qabul qilaman”, — dedi u bosh vazirlikka tayinlanganining to‘rtinchi kuni davlat televideniyesiga. “Ayblovlar yolg‘on ma’lumotlarga asoslangan. Buni haqiqat deganlarni sudga bermoqchiman”.
1-fevral kuni Peru prezidenti Pedro Kastillo yangi Vazirlar Mahkamasi tarkibini qabul qilgandi, bu davlat rahbarining 2021-yil iyul oyida lavozimiga kirishganidan beri uchinchi hukumati.
Ammo mahalliy OAV yangi bosh vazir ustidan 2016-yilda uning rafiqasi va qizi oiladagi zo‘ravonlik uchun ikki marta shikoyat qilgani haqida xabar tarqatgan. O‘z navbatida Pinto “zo‘ravon” emasligini aytib, hech qachon sudlanmaganini da’vo qildi.
Avvalroq Peruda bir hafta ichida ikkinchi vazir iste’foga chiqgani, Peru prokuraturasi mamlakat prezidentini lavozimni oshirish ishlariga aralashganlikda gumonlab, so‘roqqa tutmoqchiligi xabar qilingandi.
Yanvar oxirida Peru hukumati mamlakat poytaxti Lima va unga yondosh Kalyao avtonom okrugida jinoyatchilik ortib ketgani bois 45 kunga favqulodda holat joriy etish to‘g‘risidagi qarorni ma’qullagandi.
Izoh (0)