4 февраль куни мустақил кузатувчилар Бирлашган Миллатлар Ташкилоти Хавфсизлик кенгашининг Шимолий Кореяга қарши санкциялар бўйича қўмитасига ҳисобот тақдим этди. Мутахассисларнинг аниқлашича, КХДР ҳукумати ядровий ракеталар ишлаб чиқаришни криптовалюта ёрдамида молиялаштирмоқда. Бу ҳақда Reuters хабар берди.
Ҳужжатларга кўра, 2020 йил бошидан 2021 йил ўрталаригача Шимолий Корея хакерлари камида учта криптобиржадан 50 миллион долларлик рақамли активларни ўғирлаган. Криптовалюта платформаларига қилинган киберҳужумлар натижасида йиғилган маблағларнинг умумий миқдори 400 миллион долларга етди.
«Шимолий Корея АҚШ ва бошқа давлатлар томонидан киритилган санкциялар натижасида жаҳон молиявий тизимидан узилиб қолган. Шу сабабли улар дунёдаги вазиятни беқарорлаштиришга қаратилган қурол яратиш дастурлари ва бошқа тадбирларини молиялаштириш учун криптовалюталарни ўғирлашга ҳамда банкларни талон-тарож қилишга мажбур бўлмоқда», — деди ТРМ Лабс блокчейн компаниясининг таҳлилчиси Ник Карлсен.
Шимолий Корея ҳукумати ўғирланган рақамли активларнинг бир қисмини ядровий ва баллистик ракеталарни яратиш дастурларига сарфлаган.
АҚШ, Япония ва Жанубий Корея маълумотларига кўра, Шимолий Корея январь ойида тўққизта ракета синовларини амалга оширган. Хусусан, 30 январь куни мамлакат тезлиги товуш тезлигидан 16 марта юқори бўлган ўрта масофага мўлжалланган баллистик ракетани учирди.
Айни пайтда АҚШ Шимолий Кореянинг ракета синовларига жавоб тайёрламоқда. Шимолий Корея бўйича Америка махсус вакили Сон Ким яқин кунларда жанубий кореялик ва япониялик ҳамкасблари билан янги алоқалар ўрнатиши хабар қилинган.
Изоҳ (0)