Toshkent hayvonot bog‘ida qafasga tashlab yuborilgan qizchaga tegmagan Zuzu laqabli qo‘ng‘ir ayiqni ochiq tabiatga qo‘yib yuborish so‘ralayotgani to‘g‘risida xabar berilgandi. Toshkent hayvonot bog‘i ilmiy xodimi Feruza Mirsolixovaning so‘zlariga ko‘ra, Zuzu yovvoyi tabiat qo‘yniga qo‘yib yuborishga tayyor emas.
Ta’kidlanishicha, yovvoyi hayvonlarni tutqunlikdan yovvoyi tabiat qo‘yniga qo‘yib yuborish — juda murakkab va mas’uliyatli vazifa.
Poytaxt hayvonot bog‘i ma’muriyatning ma’lum qilishicha, o‘zi uchun hech qachon ozuqa topmagan va ov qilishni bilmaydigan, umr bo‘yi odamning qo‘lidan ovqat yegan va undan qo‘rqmaydigan ayiq och qolganda darrov duch kelgan aholi punktiga boradi va qo‘rqib ketgan odamlar tomonidan o‘ldiriladi.
“Tutqunlikda tug‘ilib o‘sgan va ota-onasi tarbiyasini olmagan jonivorlar o‘z qardoshlari bilan til topisha olmaydi, ovqat topa olmaydi, boshqa jonivorlar bilan raqobatlasha olmaydi va kuchliroq raqibdan himoyalana olmaydi. Turli yuqumli kasalliklar va jarohat yetishi ehtimolini ham nazardan qochirmaslik kerak”, — deyiladi xabarda.
Qayd etilishicha, ular jonivor uchun eng katta xavf tug‘diradigan ovchi, brakonyerlarni farqlamaydi va ular bilan uchrashuvdan qochib qutulib qola olmaydi.
“Zuzu yovvoyi tabiat qo‘yniga qo‘yib yuborishga tayyor emas. Birinchidan, Zuzu Kavkaz qo‘ng‘ir ayiqlarining kenja turi bo‘lib, tegishli ravishda Kavkazda yashaydi — O‘zbekiston hududida esa oq panjali ayiq yashaydi. Ikkinchidan, Zuzu Boku hayvonot bog‘ida kelib tushgan, u yerdan esa juda kichikligida bizga olib kelingan, odamlar tomonidan boqib, tarbiyalangan”, – deydi Toshkent hayvonot bog‘i ilmiy xodimi Feruza Mirsolixova.
Boku hayvonot bog‘i direktori Azer Huseynovning so‘zlariga ko‘ra, kiperlaridan (hayvonlarni parvarishlovchi shaxs — tahr.) ko‘rgan g‘amxo‘rlik va mehr unga yirtqichlarga xos fazilatlarni namoyon qilishga imkon bermagan. U odamdan yomonlik ko‘rmagan, shuning uchun, bolaga yomonlik qilmagan. “Xudoga shukurki, bu dahshatli voqea ibtidosi xayrli bo‘ldi”, — degan Huseynov.
Nima bo‘lgan edi?
28-yanvar kuni soat 12:00 larda yosh ayol noma’lum sabablarga ko‘ra odamlarning ko‘z oldida kichkina qizaloqni ayiq qafasiga tashlab yuborgan.“Zuzu laqabli Kavkaz qo‘ng‘ir ayig‘i o‘z volyerida yotib olib, qizaloqni metall to‘siq ustidan otib yuborgan ayol harakatlarini kuzatdi. Mehmonlarimiz va xodimlarimizning urinishlariga qaramasdan, ayolni to‘xtatib qolishning imkoni bo‘lmadi. U bolani yirtqichning qafasiga otib yuborishga erishdi. Zuzu ayig‘imiz sekingina zovurga tushib, qizaloqni hidlab ko‘rdi va undan uzoqlashdi”, — deyiladi xabarda.
Holat o‘rganilib, kichkina qizaloqni ayiq volyeriga tashlab yuborgan ayolga nisbatan jinoyat ishi qo‘zg‘atildi.
Keyinroq SSV yirtqich qafasiga tashlab yuborilgan qizchaning ahvoli to‘g‘risida ma’lumot berdi. Unda aytilishicha, 2018-yilda tug‘ilgan qizchaga dastlab hayvonot bog‘i hamshirasi birinchi yordam ko‘rsatgan. Shundan so‘ng u tez yordam mashinasida soat 13:30 larda Respublika shoshilinch tibbiy yordam ilmiy markaziga olib kelingan. Qizcha shifoxonada barcha zarur tibbiy ko‘riklardan zudlik bilan o‘tkazilgan.
“U yengil shok holatida bo‘lgan, balandlikdan yiqilish oqibatida ochiq bosh miya jarohati va bosh miya chayqalishi kuzatilgan. Hozirda uning ahvoli yaxshi, tibbiyot xodimlari nazoratida”, — deyiladi xabarda.
Toshkent hayvonot bog‘i Yirtqichlar bo‘limi mudiri Nodir Bahromov bog‘da 28-yanvar kuni sodir bo‘lgan voqea yuzasidan “Daryo”ga qo‘shimcha ma’lumotlar taqdim etdi. Xodimning ta’kidlashicha, bu holat bog‘ tarixidagi birinchisi.
“O‘zi erkak ayiq bu. Aslida erkak ayiq hatto o‘zining bolalari uchraganda yeb qo‘yib, o‘ldiradigan darajada bo‘ladi. Lekin Allohning marhamati deymiz, hatto boshi qonagan holatda ham ayiq qizchaga tegmadi va bu yerdagi xodimlar tez non va shunga o‘xshash yeguliklar bilan ayiqni chalg‘itib, uzoqlashtirdi”, — deydi Nodir Bahromov.
Mahalla va oilani qo‘llab-quvvatlash vazirligi qizini ayiq qafasiga tashlab yuborgan ayol haqida ma’lumot berdi. O‘rganishlar davomida hodisa ishtirokchilari 1991-yilda tug‘ilgan fuqaro Z.T. va uning 2018-yilda tug‘ilgan qizi Z.A. ekani aniqlangan. Z.T. ismli ayol hozirga qadar o‘z otasi, fuqaro Y.T.ga tegishli xonadonda 2 nafar farzandi bilan yashab kelgan. Ayol bilan suhbat davomida uning Toshkentdagi oliy o‘quv yurtlaridan birida o‘qituvchi bo‘lib ishlashi, ayni vaqtda Rossiya davlatiga ketgan turmush o‘rtog‘i N.K. bilan hozirda birga yashamayotgani sababli ruhiy tushkunlikka tushib qolgani ma’lum bo‘lgan.
Ijtimoiy tarmoqlarda esa Toshkent hayvonot bog‘ida ayol kichkina qizaloqni ayiq qafasiga tashlab yuborgani aks etgan videolavha tarqaldi.
Izoh (0)