Namanganda “Mahallaga kitob ulash!” loyihasi doirasida viloyatdagi 780 ta MFYga 80 mingdan ortiq kitob yetkazildi. Bu haqda “Daryo” muxbiri Azizbek Abduvaliyev xabar bermoqda.
Viloyat hokimi Shavkat Abdurazzaqov tashabbusi bilan boshlangan mazkur loyihadan maqsad mahallalarda kitobxonlik madaniyatini shakllantirish, MFYlar qoshidagi kutubxonalarni yangi adabiyotlar bilan boyitish ekanligi bildirilmoqda.
“Bugungi kunda Namangan viloyatidagi mahallalarda 150 mingdan ortiq kitob fondi mavjud. Ushbu aksiya doirasida 25 mingta kitob tarqatishni rejalashtirgandik. Yakunda esa bu tashabbus keng yoyilib, hokimliklar va homiylar tomonidan mahalla mutasaddilariga topshirilgan adabiyotlar soni 80 mingdan oshdi”, — deydi viloyat Mahalla va oilani qo‘llab-quvvatlash boshqarmasi bosh mutaxassisi Sayfiddin Muhiddinov.
Namanganda aholi qo‘liga yetib borgan kitoblarning aksariyati o‘zbek xalq og‘zaki ijodiga mansub doston, ertak va afsonalar, ijtimoiy-siyosiy adabiyotlar hamda Navoiy, Ulug‘bek, Farobiy, Naqshbandiy kabi buyuk siymolar haqida hikoya qiluvchi risolalardan iborat.
Izoh (0)