Ijtimoiy tarmoqlarda Toshkent axborot texnologiyalari universitetida kredit-modul tizimining xatosi sabab yakuniy imtihonlardan ko‘plab talabalar yiqilayotgani to‘g‘risida xabarlar tarqaldi. Universitet matbuot xizmati mazkur holatga munosbat bildirib, talabalar oliy ta’lim muassasasi hisobiga 300 million so‘mdan ortiq pul to‘lashi mumkinligi yuzasidan tarqalgan xabarlarni rad etdi.
Ma’lum qilinishicha, Muhammad al-Xorazmiy nomidagi Toshkent axborot texnologiyalari universiteti va uning hududiy filiallarida 2018/2019-o‘quv yilidan boshlab o‘qitishning kredit-modul tizimi joriy etilgan. Hozirgi kunda barcha bosqich talabalari ta’limning kredit tizimida tahsil olib kelmoqda. Universitetda o‘quv jarayoni va nazoratlarni tashkil etish uchun “lms.tuit.uz” tizimi joriy etilgan bo‘lib, bunda inson omili ishtirok etmaydi.
“Ushbu tizim 4 yil davomida universitetimizda to‘laqonli sinovdan o‘tgan va bunday holatlar kuzatilmagan. O‘tgan davr mobaynida 10 minglab talaba mazkur dargohni tamomlab, jamiyatimizda o‘z o‘rniga ega kadrlar sifatida faoliyat yuritib kelishmoqda”, — deyiladi munosabatda.
Ta’kidlanishicha, universtitetda yakuniy nazoratlar hozirda ham davom etmoqda. Nazorat ishlari natijasidan qoniqmagan taqdirda talabalar appelyatsiyaga berishi mumkin. Qayta o‘qish uchun to‘lov qiymatlariga nazorat ishlari va appelyatsiya natijalari tugallangandan so‘ng aniqlik kiritiladi. Bunda fanlardan qayta o‘qish uchun to‘lov miqdori talabaning bir yillik to‘lov shartnoma miqdorining 1 kreditga (1 kredit to‘lov miqdori kontrakt miqdorini 60 ga bo‘lingan nisbati) nisbatidan va fanga ajratilgan kredit miqdoridan kelib chiqib belgilanadi.
Bundan tashqari, xabarda bildirilgan “universitet mas’ullarining xatosi talabalarning bo‘lib o‘tgan yakuniylardan yiqilishiga sabab bo‘lgani” haqidagi xabarlarga ham munosabat bildirilgan.
Universitetda tasdiqlangan o‘quv jadvaliga ko‘ra, 2022-yil 2-fevral kuni soat 11:00 da 2-bosqich talabalariga “Diskret tuzilmalar” fanidan onlayn rejimda 1400 nafarga yaqin talabaga yakuniy nazorat ishi o‘tkazilgan. Ishtirok etganlardan 50 foiz talaba baholash me’zonlarida belgilangan o‘tish ballarini to‘plab muvaffaqiyatli o‘tgan (ushbu ro‘yxatdagi 300 ga yaqin talabalar a’lo va yaxshi baholar bilan, qolgan 300 dan ortig‘i ham kerakli ballar to‘plagan). Qolgan talabalar orasidan 72 nafarida esa “lms.tuit.uz” tizimida kuzatilgan qisqa texnik nosozlik sababli savollar variantlarini generatsiyalash jarayonida buzilish yuz bergan. Mavjud texnik nosozlikni bartaraf etish yuzasidan zudlik bilan universitetning Telegram tarmog‘idagi rasmiy kanallari (TATU|Rasmiy kanali va Credit System of TUIT) orqali ma’lum qilingan.
Universitet ma’muriyati mazkur holat bo‘yicha murojaat qilgan talabalar uchun qayta yakuniy nazorat olinishini ma’lum qiladi.Ta’kidlanishicha, yakuniy nazoratlarda tushgan savollarga e’tiroz bildirgan talabalarga “lms.tuit.uz” tizimida apellyatsiya tartibida qayta ko‘rish uchun ariza berish imkoniyati yaratilgan. Apellyatsiya jarayonlari 2-bosqich talabalari uchun barcha imtihonlar yakunlangandan so‘ng o‘tkaziladi.
Avvalroq Oliy va o‘rta maxsus ta’lim vazirligi ushbu masalani o‘rganish bo‘yicha mas’ullardan iborat tezkor ishchi guruh tuzilganini ma’lum qilgandi. Vazirlik matbuot kotibi Mo‘min Ibodov ishchi guruh olib borayotgan o‘rganish yakunlari ham e’lon qilinishini bildirgan.
Izoh (0)