Senatorlar “Xalqaro mehnat tashkilotining Qurilishda mehnat xavfsizligi va gigiyenasi to‘g‘risidagi 167-sonli konvensiyasini ratifikatsiya qilish haqida”gi qonunni ko‘rib chiqdi. Bu haqda Oliy Majlis Senati xabar qildi.
Qayd etilishicha, konvensiya 1988-yil 20-iyunda XMT Bosh konferensiyasi sessiyasidan qabul qilingan. Konvensiya qurilish faoliyatining barcha turlarini, ya’ni qurilish, fuqarolik qurilishi, montaj va demontaj ishlarini, shu jumladan, qurilish maydonidagi maydonni tayyorlashdan to obyekt qurib bitkazilgunga qadar har qanday jarayonlar, operatsiyalar yoki transportda tashish ishlarini qamrab oladi.
Muhokamalarda senatorlar O‘zbekistonda mehnat xavfsizligi va gigiyenasi talablariga rioya qilish holati, bu boradagi asosiy muammoli nuqtalar yuzasidan o‘z fikr-mulohazalarini bildirgan. Mazkur konvensiya 32 davlat, shu jumladan, Rossiya, Belarus va Qozog‘iston kabi MDH mamlakatlari tomonidan ratifikatsiya qilingani qayd etilgan.
Shuningdek, konvensiyaning aksariyat norma va qoidalari milliy qonunchilikka tatbiq etilgani alohida ta’kidlangan.
“Ushbu konvensiyaning ratifikatsiya qilinishi qurilish sohasiga mehnat xavfsizligi va gigiyenasi bo‘yicha xalqaro standartlarni samarali joriy etishga xizmat qiladi. Bu, ayniqsa, mamlakatimizning mehnatkashlar huquqlari kafolatini ta’minlashda asosiy xalqaro prinsip va standartlarga sodiqligini ko‘rsatadi”, — deyiladi xabarda.
Qonun senatorlar tomonidan ma’qullangan.
Eslatib o‘tamiz, 2021-yil may oyida O‘zbekiston 2021-yilda Xalqaro mehnat tashkilotining kamida yana ikkita — “1952-yilgi Onalikni muhofaza qilish konvensiyasini qayta ko‘rib chiqish” (№183) va “Mehnat xavfsizligi va gigiyenasiga ko‘maklashuvchi asoslar to‘g‘risida”gi (№187) konvensiyalarni ratifikatsiya qilishni rejalashtirayotgani xabar qilingandi.
Izoh (0)